2 Kronikas 32 - BIBLIA - traduson antigu in Krioulo

Senakerib ameasa Jerusalen

¹ Dipus de bon tarbaju ku Ezekias fasi, Senakerib, rei di Asiria, yentra na Judá, i pui si tropas na roda di prasas forti, pa i pudi toma elis.

² Oca ku Ezekias oja kuma Senakerib bin ku pensamentu di geria kontra Jerusalen,

³ i riuni ku si ŝefis ku ŝefis di tropa, i pui elis ideia di tapa fontis di yagu ku sta fora di prasa. Elis e konkorda.

⁴ Manga di jinti junta, e tapa tudu fontis, suma tambi ki riusiñu ku ta laguaba na metadi di tera. E punta: “Pabia di ke ku rei di Asiria ku si jintis na bin oja manga di yagu li?”

⁵ Ezekias pega tesu, i kumpu tudu kau di mura ku danaba, i kumpu toris riba del, i kumpu utru mura na ladu di fora, i fortifika Milu na prasa di Davi, i kumpu manga di material di gera ku tajaderas.

⁶ I pui ŝefis di tropa riba di omis, i junta elis si dianti lungu di porton di prasa, i papia ku elis pa nkoraẑa elis, i fala:

⁷ “Bo sedu forti, bo ten koraẑen; ka bo medi nin ka bo panta pabia di rei di Asiria, nin pabia di ki manga di jinti ku sta ku el, pabia puder ku sta ku nos i mas di selis.

⁸ I forsa di omi ku sta ku el, ma SIÑOR no Deus, el ku sta ku nos, pa judanu, pa geria pa nos.” Asin pobu diskansa na palabra di Ezekias, rei di Judá.

⁹ Mas tardi Senakerib, rei di Asiria, oca ki staba dianti di Lakís ku tudu si tropas, i manda si ŝefis pa Jerusalen ku rekadu pa Ezekias ku tudu pobu di Judá ku staba na Jerusalen, i fala:

¹⁰ “Ami, Senakerib, rei di Asiria, N na punta bos: Na ke ku bo fiansa nel, ku manda bo fika na Jerusalen ku no taja ja?

¹¹ Ezekias na ngana bos, pa bo muri di fomi ku sedi, manera ki fala bos: ‘SIÑOR no Deus na libranu na mon di rei di Asiria.’

¹² Nta i ka Ezekias propi ku tira altaris di Deus, ku si kaus altu, i manda pobu di Judá ku Jerusalen pa e mpina dianti di un altar son, pa e kema nsensu la?

¹³ Bo ka sibi nan ke ku no fasi tudu pobu di utru teras, ami ku ña papes? Nta deusis di ki nasons pudiba libra se tera na ña mon?

¹⁴ Kal un di tudu deusis di ki nasons ku ña papes kaba ku el ku pudiba libra si pobu di ña mon? Ku fadi gora bo Deus pudi bin libra bos di ña mon?

¹⁵ Asin, ka bo disa Ezekias konta mintida pa ngana bos, nin ka bo fia nel, pabia nin un deus di kualker nason nin di kualker renu pudiba libra si pobu di ña mon, nin di mon di ña pape. Ku fadi gora bo Deus, i na pudi libra bos di ña mon?”

¹⁶ Ŝefis di Senakerib papia inda mas utru kusas kontra SIÑOR Deus, tambi kontra si servu Ezekias.

¹⁷ Rei tambi skirbi karta pa koba SIÑOR Deus di Israel, pa papia kontra el; i fala: “Suma ku deusis di rasas di utru teras ka libra se pobu di ña mon, asin tambi Deus di Ezekias ka na libra si pobu di ña mon.”

¹⁸ Si ŝefis na gritaba risu na lingua di judeus pa pobu di Jerusalen ku sintaba riba di mura, pa miti elis medu, pa pantanda elis, pa pudi toma prasa.

¹⁹ E papia di Deus di Jerusalen suma e na papia di deusis di rasas di utru teras, ku sedu deusis ku omi kumpu ku mon.

²⁰ Ezekias ku anunsiadur Isaias, fiju di Amoz, e yalsa fála pa seu, e ora Deus pabia de kusas.

²¹ SIÑOR manda anju ku mata tudu omis di gera ku kapitons ku ŝefis na kampamentu di rei di Asiria. Rei riba incidu di borgoña pa si tera. Oca ki yentra na baloba di si deus, si propi fijus ki padi e matal la ku spada.

²² Asin ku SIÑOR libra Ezekias ku moraduris di Jerusalen di mon di Senakerib, rei di Asiria, ku mon di tudu se inimigus, i da elis susegu na tudu ladu.

²³ Manga di jinti bin pa Jerusalen, e tisi ofertas pa SIÑOR, ku kusas di balur pa Ezekias, rei di Judá. Disna di ki tempu Ezekias ngaña rispitu dianti di uju di tudu nasons.

Duensa di Ezekias

²⁴ Na ki tempu Ezekias duensi pa muri; i ora SIÑOR; SIÑOR ruspundil, i dal un garandi sinal,

²⁵ ma Ezekias bin sedu ingratu pa bondadi ku Deus mostral, pabia si korson bin inci ku orgulyu. Asin garandi raiba di Deus bin riba del, tudu ku Judá ku Jerusalen.

²⁶ Ezekias ripindi di orgulyu di si korson, i baŝa, el ku moraduris di Jerusalen, ku pui Deus ka bin manda kastigu riba delis na tempu di Ezekias.

²⁷ Ezekias teneba manga di rikesa ku fama. I kumpu armazens pa rakada prata, uru, pedras di balur, kusas ku ta cera sabi, tajaderas, ku tudu koldadi kusas ku algin pudi misti.

²⁸ I kumpu tambi bembas pa rakada si trigu, biñu nobu ku azeiti, ku kasas pa tudu koldadi limarias, ku koral pa karnel.

²⁹ Fora di kila, i kumpu prasas; i teneba manga di karnel ku baka, pabia Deus dalba manga di rikesa.

³⁰ I Ezekias ku tapa uju di fonti di riba di Jion, i pui yagu pa i lagua bas te na prasa di Davi, pa ladu di kaida di sol. Tudu kusa ki fasi i kuril diritu.

³¹ Oca ku ŝefis di Babilonia manda mbaŝaduris pa el, pa puntal aserka di ki garandi sinal ku fasidu na tera, Deus disal pa spurmental, pa sibi ke ku staba na si korson.

³² Restu di kusas ku pasa ku Ezekias, ku si bon kusas ki fasi, e sta skritu na Vison di Anunsiadur Isaias, fiju di Amoz, ku na libru di Storia di Reis di Judá ku Israel.

³³ Ezekias bin diskansa, i nteradu lungu di si papes na ladu mas altu di simiteriu di jorson di Davi. Tudu Judá ku moraduris di Jerusalen e dal onra na si mortu. Si fiju Manasés bin rena na si konta.