2 Kronikas 30 - BIBLIA - traduson antigu in Krioulo

Ezekias organisa Paskua

¹ Dipus di kila, Ezekias manda rekadu pa tudu Israel ku Judá; i skirbi kartas pa Efrain ku Manasés pa kumbida elis pa e bin pa kasa di SIÑOR na Jerusalen pa mati Paskua di SIÑOR Deus di Israel,

² pabia rei riuniba ku ŝefis ku tudu juntamentu na Jerusalen, e marka festival di Paskua pa sugundu mis,

³ suma ki ka pudiba fasidu na si tempu propi, pabia numeru di saserdotis purifikadu i ka ciu ba; tambi pobu ka juntaba inda na Jerusalen.

⁴ Rei ku tudu pobu e kontenti ku e planu.

⁵ E ruma pa i anunsiadu na tudu Israel, desdi Berseba te na Dan, pa jintis bin pa Jerusalen pa mati Paskua di SIÑOR Deus di Israel. Manga delis e ka ciga di matil na manera ki sta skritu na lei.

⁶ Konformi mandadu di rei, jintis toma kartas na mon di rei ku si ŝefis, e leba elis pa tudu Israel ku Judá. Kartas fala: “Fijus di Israel, bo riba pa SIÑOR, Deus di Abraon, Isak ku Israel, pa i riba pa bos ku sobra inda, ku kapli na mon di reis di Asiria.

⁷ Ka bo sedu suma bo papes ku bo ermons ku ka seduba fiel pa SIÑOR, Deus di se papes, ku bin pul i manda kastigu meduñu riba delis, suma ku bo na oja.

⁸ Ka bo sedu ntemus suma bo papes; bo baŝa bo kabesa dianti di SIÑOR, bo bin pa si templu ki santifika pa sempri. Bo sirbi SIÑOR bo Deus, pa fugu di si raiba pudi disviadu di bos.

⁹ Si bo riba pa SIÑOR, kilis ku leba bo ermons ku bo fijus katibu e na ten pena delis, e disa elis pa e riba pa e tera, pabia SIÑOR bo Deus ta sinti pena ku amor. I ka na rabida si rostu di bos si bo riba pa el.”

¹⁰ Jintis ku leba kartas e bai, e pasa di un prasa pa utru na tera di Efrain ku Manasés, te na Zebulon, ma jintis ri elis, e fasi elis trosa.

¹¹ Mesmu asin, utru jintis di Aser ku Manasés ku Zebulon e baŝa, e bin pa Jerusalen.

¹² Deus staba ku jintis di Judá, i da elis un korson son, pa e obdisi ordi ku rei ku ŝefis da konformi palabra di SIÑOR.

¹³ Manga di jinti junta na Jerusalen na sugundu mis pa mati festival di pon sin fermentu.

¹⁴ E lanta e tira altaris ku ojadu na Jerusalen, tambi ku tudu altaris di nsensu, e bota elis na riusiñu di Sedron.

¹⁵ E mata karnel di Paskua na dia 14 di sugundu mis. Saserdotis ku levitas sinti borgoña, e bai purifika se kabesa, e tisi ofertas kemadu pa kasa di SIÑOR.

¹⁶ E toma se lugar di kustumu, suma ku lei di Moisés, omi di Deus, fala. Saserdotis toma sangi na mon di levitas, e wagal.

¹⁷ I tenba manga delis na metadi di juntamentu ku ka staba purifikadu. Pabia di kila, levitas tenba ku mata karnel di Paskua na konta di kada kin ku staba impuru, e dedikal pa SIÑOR.

^18-19 Manera ku manga di jinti di Efrain, Manasés, Isakar ku Zebulon e ka fasiba sirmonia di purifikason, e kume Paskua kontra kil ku sta skritu na lei. Ezekias ora pa elis, i fala: “O SIÑOR, Deus di no papes, suma ku bu sedu bon, purda kilis ku purpara se korson pa buskau, SIÑOR Deus, nin si e ka sta purifikadu konformi lei di kau sagradu.”

²⁰ SIÑOR obi orason di Ezekias, i purda pobu.

²¹ Fijus di Israel ku staba na Jerusalen e fasi festival di pon sin fermentu pa seti dia, ku garandi kontentamentu. Levitas ku saserdotis e kanta pa ngaba SIÑOR kada dia, ku instrumentus di SIÑOR ku ten son altu.

²² Ezekias papia palabras di animu pa tudu levitas ku tenba bon ntindimentu na sirvis di SIÑOR. E kume ofertas di festival pa seti dia, e fika e na da ofertas di pas, e na ngaba SIÑOR, Deus di se papes.

²³ Tudu juntamentu papia entri elis, e disidi kontinua pa mas seti dia. Asin e junta pa mas seti dia ku kontentamentu.

²⁴ Ezekias, rei di Judá, i da pobu mil turu ku seti mil karnel; ŝefis da elis mil turu ku des mil karnel. Garandi numeru di saserdotis e purifikaba ja se kabesa.

²⁵ Tudu juntamentu di Judá kontenti, juntu ku saserdotis ku levitas, ku tudu jintis ku bin di Israel, tambi ku stranjerus ku bin di Israel, ku kilis ku mora na Judá.

²⁶ Kontentamentu garandi staba na prasa di Jerusalen, pabia disna di tempu di Salomon, fiju di Davi, rei di Israel, i ka fasidu un kusa suma es na Jerusalen.

²⁷ Saserdotis ku levitas lanta, e bensua pobu. Deus obi elis, pabia se orason ciga te na seu, kau sagradu nunde ki mora.