2 Kronikas 3 - BIBLIA - traduson antigu in Krioulo

Tarbaju di templu kumsa

¹ Davi, pape di Salomon, i purparaba kau pa templu na kau ku SIÑOR mostralba, na monti di Moriá na Jerusalen, ku seduba kau di masa di Ornan, ki jebuseu. Salomon kumsa kumpu kasa di SIÑOR

² na sugundu dia di sugundu mis di kuartu anu di si renansa.

³ Alisersu ku Salomon pui pa kumpu kasa di Deus i teneba 27 metru di kumprimentu ku 9 metru di largura, konformi midida antigu.

⁴ Baranda di entrada na frenti i teneba 9 metru di kumprimentu, suma largura di kasa, ku 9 metru di altura. Dentru di kasa i foradu ku uru puru.

⁵ I fora kuartu garandi ku madera di piñeru, i kubril ku uru finu; i toma furmon i labra palmeras ku korentis.

⁶ I faja kasa ku joias di balur; uru ki usa i binba di Parvain.

⁷ Ku ki uru i kubri madera di tetu, arus, portas ku paredis; i labra kirubins na paredi.

⁸ I fasi tambi kau mas sagradu di tudu, ku kumprimentu di 9 metru suma largura di kasa; si largura tambi i di 9 metru. I kubril ku mas di ki vinti tonolada di uru finu.

⁹ Pesu di uru pa kumpu pregus i sedu serka di seizentus grama. Kuartus di riba e foradu ku uru tambi.

Dus kirubin

¹⁰ Na kau mas sagradu di tudu, Salomon forma dus kirubin, i kubri elis ku uru.

¹¹ Kumprimentu kompletu di se asas i seduba 9 metru. Un asa di purmeru kirubin i midiba 2,25 metru, i toka na paredi di kasa. Si utru asa i midiba tambi 2,25 metru, i toka na asa di si kumpañer,

¹² ku teneba tambi asas di 2,25 metru kada un, ku distindi desdi asa di ki purmeru kirubin te na paredi.

¹³ Asin asas di tudu dus kirubin e distindi pa 9 metru. E staba di pe, ku rostu viradu pa entrada.

¹⁴ I kumpu kurtina di lan azul, purpura ku burmeju, ku liñu finu, ku kirubins diseñadu nel.

Dus kuluna di kobri

¹⁵ Dianti di kasa i kumpu dus kuluna, kada un 8 metru di altura, ku un kapitel di 2,3 metru riba di kada un.

¹⁶ I kumpu tambi korentis pa faja kapitelis ku staba riba di kulunas. I kumpu sen roman, i pui elis na metadi di korentis.

¹⁷ Kulunas lantandadu dianti di templu, un na kada ladu di entrada. Kil ku staba na mon direita i comadu Jakin; kil ku staba na skerda i comadu Boaz.