2 Kronikas 28 - BIBLIA - traduson antigu in Krioulo

Akaz, rei di Judá

¹ Akaz teneba idadi di vinti anu oca ki yentra na renansa, i rena disaseis anu na Jerusalen. I ka yandaba diritu dianti di SIÑOR suma ku si pape Davi yandaba,

² ma i yanda na kamiñu di reis di Israel, tok i kumpu imaẑens fundidu pa Baal.

³ I kema nsensu na kobon di fiju di Inon, i kema si propi fijus na fugu, konformi kustumus nujenti di nasons ku SIÑOR tiraba fora oca ku fijus di Israel na yentraba na tera.

⁴ I sakrifika, i kema nsensu na kaus altu, na montis, ku bas di tudu arvuri garandi.

⁵ Asin, SIÑOR si Deus ntregal na mon di rei di Siria. Tropas di Siria ngañal, e toma manga di jinti prezu, e leba elis katibu pa Damasku. Akaz ntregadu tambi na mon di rei di Israel, ku mata manga di si tropas.

⁶ Na un dia son, Peka, fiju di Remalias, i mata sentu i vinti mil di tropas mas minjor di Judá, pabia pobu di Judá disa SIÑOR, Deus di se papes.

⁷ Zikri, un soldadu forti di Efrain, i mata Maaseias, fiju di rei, ku Azrikan, nkargadu di palasiu, ku Elkana, purmeru ministru di rei.

⁸ Tropas di Israel leba duzentus mil di se parentis di Judá prezu — minjeris ku fijus macu ku femia. E roba tambi manga di rikesas, e lebal pa Samaria.

⁹ I staba la un anunsiadur di SIÑOR comadu Obed. I bai kontra ku tropas ku na ribaba pa Samaria, i fala elis: “Manera ku SIÑOR Deus di bo papes ten raiba kontra Judá, i ntrega elis na bo mon, ma abos bo mata elis ku raiba ku ciga na seu.

¹⁰ Gosi ja, bo misti tene omis ku minjeris di Judá ku Jerusalen suma bo katibus. Nta abos tambi, bo ka kulpadu dianti di SIÑOR bo Deus?

¹¹ Gosi bo sukutan; bo torna ki bo parentis ku bo tisi katibu, pabia fugu di raiba di SIÑOR sindi ja riba di bos.”

¹² Utru ŝefis di Efrain, ku sedu Azarias, fiju di Joanan, Berekias, fiju di Mesilemot, Jeizkias, fiju di Salun, ku Amasa, fiju di Adlai, e lanta kontra kilis ku na ribaba di gera,

¹³ e fala elis: “Ka bo yentra ku ki katibus li, o no na ojadu kulpadu dianti di SIÑOR. Bo na buri kulpa riba di no pekadu. No ten ja kulpa garandi, tok fugu di raiba di SIÑOR sta ja riba di Israel.”

¹⁴ Asin tropas ntrega katibus, ku rikesa ke tisi di Judá, na mon di ŝefis ku tudu juntamentu.

¹⁵ Omis ku se nomis comadu e lanta e toma ki prezus. E tira ropa na metadi di ki kusas ku tisidu di Judá, e bisti kilis ku staba nun. E da elis ropa ku sapatus, e da elis kumida ku kusa di bibi, e unta elis kaus ke molosta. Kilis ku staba fraku, e pui elis riba di burus, e leba elis pa Jerikó, prasa di palmeras, nunde se parentis. Dipus e riba pa Samaria.

Akaz buska ajuda di rei di Asiria

¹⁶ Na ki tempu rei Akaz manda pidi sakur na mon di rei di Asiria,

¹⁷ pabia edomeus bai ataka Judá, e leba utrus pa katiberasku.

¹⁸ Filisteus tambi e ataka prasas di montisiñus ku di sul di Judá, e toma Bet-Semes, Aijalon, Jederot, Sokó, Timna ku Ginzu, ku tudu se tabankasiñus na roda, e bai mora la.

¹⁹ SIÑOR baŝa Judá pabia di rei Akaz ku disvianta pobu, i ntrega si kabesa pa peka kontra SIÑOR.

²⁰ Tiglat-Pileser, rei di Asiria, i bin pa el ma, te pa i judal, i buril nan kansera.

²¹ Akaz tira utru rikesas na kasa di SIÑOR ku kasa di rei ku di ŝefis, i da rei di Asiria, ma kila i ka judal nada.

²² Na si tempu di foronta, rei Akaz peka inda mas kontra SIÑOR.

²³ Suma ku tropas di Siria ngañal na gera, i sakrifika limarias pa deusis di Damasku, i fala: “Manera ku deusis di reis di Siria juda elis, N na ronia elis pa e pudi judan tambi.” Pabia delis i bin kai, el ku tudu Israel.

²⁴ Akaz junta material di kasa di SIÑOR, i kebra-kebral, i fica portas di kasa di SIÑOR, i kumpu altaris na tudu kantu di Jerusalen.

²⁵ Tambi, na kada prasa di Judá, i kumpu kaus altu pa kema nsensu pa utru deusis. Asin i lantanda raiba di SIÑOR, Deus di si papes.

²⁶ Tudu utru kusas ku pasa ku el, ku tudu manera ki yanda, disna di kumsada te na kabantada, e sta skritu na libru di Storia di Reis di Judá ku di Israel.

²⁷ Akaz bin diskansa. E nteral lungu di si papes na prasa di Jerusalen, ma e ka pul na simiteriu di reis di Israel. Si fiju Ezekias rena na si konta.