2 Kronikas 27 - BIBLIA - traduson antigu in Krioulo

Jotan, rei di Judá

¹ Jotan teneba idadi di vinti i sinku anu oca ki yentra na renansa, i rena disaseis anu na Jerusalen. Si mame seduba Jerusa, fiju di Zadok.

² I ta fasiba kusas diritu dianti di SIÑOR suma ku si pape Uzias fasi, so ku el i ka yentra na kasa di SIÑOR, ma pobu kontinua na yanda mal.

³ Jotan kumpu porton altu di kasa di SIÑOR; i fasi manga di tarbaju na mura na ladu di Ofel.

⁴ I kumpu tambi prasas na montañas di Judá, i kumpu kuartelis ku toris na matu garandi.

⁵ I geria kontra rei di amonitas, i ngaña; asin amonitas dal na ki anu 3,4 tonolada di prata, 2.000 tonolada di trigu ku 2.000 tonolada di sevada. E torna tisil mesmu kusa na sugundu ku terseru anu.

⁶ Jotan torna forti, pabia i yanda diritu dianti di SIÑOR si Deus.

⁷ Utru kusas ku pasa ku Jotan, ku tudu geras ki fasi, ku manera ki yanda, e sta skritu na libru di Storia di Reis di Israel ku di Judá.

⁸ I yentra na renansa ku idadi di vinti i sinku anu, i rena disaseis anu na Jerusalen.

⁹ I bin diskansa, i nteradu lungu di si papes na prasa di Davi. Si fiju Akaz rena na si konta.