2 Kronikas 25 - BIBLIA - traduson antigu in Krioulo

Amazias ngaña edomeus

¹ Amazias teneba vinti i sinku anu di idadi oca ki yentra na renansa, i rena vinti i novi anu na Jerusalen. Si mame seduba Jeoadan di Jerusalen.

² I fasi kil ki diritu na uju di SIÑOR, ma i ka ku tudu korson.

³ Oca ku renansa staba ja firmi na si mon, i manda mata si ŝefis ku mataba si pape.

⁴ I ka mata se fijus, ma i fasi suma ki sta skritu na lei, na libru di Moisés, nunde ku SIÑOR fala: “Papes ka na matadu pa kulpa di fijus, nin fijus ka na matadu pabia di kulpa di papes; kada kin dibi di matadu pabia di si propi pekadu.”

⁵ Amazias junta tudu omis di Judá ku Benjamin, i rapati elis konformi familias di se papes, i pui elis na konta di ŝefis di mil ku di sen. Numeru di kilis di vinti anu pa riba i sedu 300.000; e seduba omis kujidu, purparadu pa gera, ku sibi usa kañaku ku tajadera.

⁶ Tambi i paga 3,4 tonolada di prata pa luga 100.000 tropa di Israel.

⁷ Un omi di Deus bai pa el i falal: “Ñu Rei, ka Ñu disa tropas di Israel pa e bai ku bo pa gera, pabia SIÑOR ka sta ku Israel, nin ku fijus di Efrain.

⁸ Si bu pensa kuma bu na sedu mas forti pa gera, Deus na fasiu pa bu kai dianti di bu inimigu, pabia i Deus ku ten puder pa juda, tambi i ten puder pa fasi algin kai.”

⁹ Amazias punta omi di Deus: “Ma ki prata ku N paga pa luga e tropas di Israel?” Omi di Deus falal: “SIÑOR tene mas di ki kila pa dau.”

¹⁰ Amazias separa tropas di Efrain ku binba pa el, i ribanta elis pa se tera. E paña raiba kontra Judá, e riba pa se tera kinti na se raiba.

¹¹ Amazias mara koraẑen, i leba si tropas pa Kobon di Sal, nunde ki mata des mil di tropas di Seir.

¹² E prindi tambi mas des mil bibu, e leba elis riba di un pedra altu, e bota elis pa bas; e kai tudu; se kurpus rebenta.

¹³ Ki tropas di Israel ku Amazias ribanta pa e ka bai ku elis pa gera, e bai ataka prasas di Judá, entri Samaria ku Bet-Oron, e mata tris mil jinti, e leba manga di rikesa.

Idulatria di Amazias

¹⁴ Oca ku Amazias kaba mata edomeus, i riba, i leba idulus di fijus di Seir, i fasi elis si deusis, i mborka se dianti, i kema nsensu pa elis.

¹⁵ Raiba di SIÑOR sindi kontra Amazias; i mandal un anunsiadur ku bai puntal: “Ke ku manda bu adora deusis ku ka pudiba kaplinti se pobu na bu mon?”

¹⁶ Antis di i kaba papia, Amazias ruspundi i puntal: “Nta no pou pa bu sedu konsijadur di rei? Kala! Ke ku manda bu na buska matadu?” Anunsiadur kala, ma son dipus ki fala: “N oja kuma Deus marka ja pa kaba ku bo, pabia bu fasi e kusa, bu nega obi ña konsiju.”

Gera kontra Israel

¹⁷ Amazias, rei di Judá, konsulta ideia di si konsijaduris; dipus i manda rekadu pa Jeoás, fiju di Jeoakaz, fiju di Jeu, rei di Israel, i falal: “Bin de, pa no oja uju ku uju!”

¹⁸ Jeoás, rei di Israel, i manda fala Amazias, rei di Judá: “Un bias, na Líbanu, pe di fidida manda fala sedru: ‘Dan bu fiju pa i sedu minjer di ña fiju.’ Ma limarias di matu pasa, e masa ki pe di fidida la na Líbanu.

¹⁹ Bu na njata pabia bu ngaña edomeus; gosi, bu inci bu kabesa ku orgulyu. Fika na bu kasa. Nta pabia di ke ku bu na buska miti bu kabesa na mal, pa bu pudi kai, abo ku Judá?”

²⁰ Amazias nega obi, pabia i Deus ku staba tras des tudu, pa pudi ntrega elis na mon di se inimigus, manera ke adoraba deusis di edomeus.

²¹ Asin Jeoás, rei di Israel, i bai ataka; el ku Amazias, rei di Judá, e oja ŋutru na Bet-Semes, na Judá.

²² Judá kai dianti di Israel; kada kin kuri pa si kasa.

²³ La na Bet-Semes Jeoás, rei di Israel, i prindi Amazias, rei di Judá, fiju di Joás, fiju di Akazias, i lebal pa Jerusalen, i bati mura di Jerusalen desdi porton di Efrain te na porton di skina, un distansia di 180 metru.

²⁴ I leba tudu uru ku prata, ku tudu kusas ku ojadu na kasa di Deus na mon di Obed-Edon, ku tudu rikesa di kasa di rei; i toma tambi utru jinti prezu, i riba pa Samaria.

²⁵ Amazias, fiju di Joás, rei di Judá, i vivi mas kinzi anu dipus di mortu di Jeoás, fiju di Jeoakaz, rei di Israel.

²⁶ Tudu utru kusas ku pasa na renansa di Amazias, disna di kumsada te na kabantada, e sta skritu na librus di Storia di Reis di Judá ku di Israel.

²⁷ Disna ku Amazias disvia di SIÑOR, i tenba jinti ku na filanta pa matal. I bin kuri pa Lakís, ma e manda jinti si tras; e bai matal la na Lakís.

²⁸ Jinti tisi si kurpu riba di kabalu pa Jerusalen, e nteral lungu di si papes na prasa di Davi.