2 Kronikas 22 - BIBLIA - traduson antigu in Krioulo

Akazias, rei di Judá

¹ Jinti ku mora na Jerusalen toma Akazias, fiju mas nobu di Jeoran, rei di Judá, e fasil rei na konta di si pape, pabia ki tropas ku binba ku jinti di Arabia pa ataka Judá e mataba fijus mas garandi.

² I teneba vinti i dus anu di idadi oca ki yentra na renansa, i rena un anu na Jerusalen. Nomi di si mame seduba Atália, netu di Onri.

³ Akazias yanda tambi na kamiñus di familia di Akab, pabia Atália, si mame, i el ku ta dalba konsiju pa i fasi mal.

⁴ I fasi kusas mau na uju di SIÑOR, suma ku familia di Akab fasiba, pabia i elis ku seduba si konsijaduris dipus di mortu di si pape. Es lebal pa disgrasa.

⁵ Pabia di se konsiju i bai ku Joran, fiju di Akab, rei di Israel, pa geria kontra Azael, rei di Siria, lungu di Ramot-Jilead. Tropas di Siria e molosta Joran.

⁶ Kila riba pa Jizreel pa kura si molostus ki paña na Ramot, oca ki bai gera kontra Azael, rei di Siria. Akazias, fiju di Jeoran, rei di Judá, i bai visita Joran, fiju di Akab, na Jizreel, pabia i staba duenti.

⁷ Deus usa ki visita pa Joran pa pudi kaba ku vida di Akazias, pabia, oca ku Akazias ciga nunde Joran, i sai ku el pa kontra ku Jeu, fiju di Ninsi, kil ku SIÑOR unjiba ja pa i kaba ku familia di Akab.

⁸ Oca ku Jeu na kumpri ki julgamentu kontra familia di Akab, i bin kontra ku ŝefis di Judá ku fijus di ermons di Akazias ku kumpañalba. I mata elis.

⁹ Dipus Akazias buskadu; e prindil oca ki na sukundi na Samaria. E lebal pa Jeu, e matal, e nteral, pabia e fala: “El i fiju di Jeosafá, kil ku buska SIÑOR ku tudu si korson.” Asin i ka tenba ja mas ningin na familia di Akazias ku teneba forsa pa rena.

Atália manda mata familia di rei

¹⁰ Oca ku Atália, mame di Akazias, oja kuma si fiju matadu, i lanta, i da ordi pa mata tudu familia di rei di Judá,

¹¹ ma Jeoseba, fiju di rei Jeoran, minjer di saserdoti Jeoiada, toma Joás, fiju di Akazias, i tiral na metadi di utru fijus di rei ku na matadu, i bai sukundil na un kuartu di durmi, na templu, juntu ku minjer ku ta tomaba konta del. Asin Jeoseba, irma di Akazias, i kaplinti Joás na mon di Atália, pa ka i matal.

¹² I fika ku elis sukundidu na kasa di Deus duranti seis anu, oca ku Atália na mandaba riba di tera.