2 Kronikas 21 - BIBLIA - traduson antigu in Krioulo

Rei Jeoran di Judá

¹ Jeosafá diskansa ku si papes, i nteradu juntu ku elis na prasa di Davi. Si fiju Jeoran toma si lugar na renansa.

² Jeoran teneba ermons: Azarias, Jeiel, Zakarias, Asarias, Mikael ku Sefatias. Esis tudu seduba fijus di Jeosafá, rei di Judá.

³ Se pape pati elis manga di prata ku uru, ku mas utru kusas di balur. I nkarga elis ku utru prasas forti di Judá, ma i da renansa pa Jeoran, pabia el i purmeru fiju.

⁴ Oca ku Jeoran staba ja forti na renansa, i mata tudu si ermons ku spada, ku utru ŝefis di Israel.

⁵ Jeoran teneba trinta i dus anu oca ki yentra na renansa, i rena oitu anu na Jerusalen.

⁶ I yanda na kamiñu di familia di Akab ku di utru reis di Israel, pabia i kasaba fiju di Akab. I ta fasiba kusas mau dianti di SIÑOR.

⁷ SIÑOR ka mistiba kaba ku renansa di jorson di Davi, pabia di kontratu ki fasiba ku el, oca ki falal kuma sempri i na ten algin di si jorson na renansa suma lus.

⁸ Duranti si renansa edomeus ravolta, e nega fika bas di Judá, e ranja se propi rei.

⁹ Jeoran lanta i bai ku si ŝefis, ku tudu si karus. Edomeus bin tajal ku si ŝefis di karus, ma di noti Jeoran lanta, i fura i kapli.

¹⁰ Asin edomeus fika indipendenti di Judá te aos. Na mesmu tempu Libna tambi ravolta, i nega fika bas di ordi di Jeoran, pabia Jeoran bandona SIÑOR, Deus di si papes.

¹¹ I kumpu kaus altu di ronia na montis di Judá, i pinca jinti ku mora na Jerusalen ku na Judá pa e bai fasi kusas nujenti kontra SIÑOR.

¹² I risibi karta ku anunsiadur Elias skirbiba, ku fala: “Asin ku SIÑOR, Deus di bu pape Davi, fala: ‘Bu ka yanda na kamiñus di bu pape Jeosafá, nin di Asa, rei di Judá,

¹³ ma bu yanda na kamiñu di reis di Israel, bu pui jinti ku mora na Judá ku Jerusalen pa e fasi kusas nujenti, suma ku familia di Akab fasi. Tambi bu mata bu ermons, fijus di bu pape propi, jinti ku seduba mas minjor di ki bo.

¹⁴ Asin SIÑOR na kastiga bu pobu ku garandi kastigu, ku bu minjeris ku fijus ku tudu ku bu tene.

¹⁵ Abo tambi bu na sufri ciu ku duensa di bariga ku na piora puku puku, tok tripas sai.’ ”

¹⁶ I tenba utru filisteus ku jinti di Arabia ku moraba pertu di kau nunde ku jinti di Etiopia moraba. SIÑOR cuci elis kontra Jeoran.

¹⁷ E lanta e bai ataka Judá, e leba tudu rikesa ku ojadu na kasa di rei, suma tambi si minjeris ku si fijus; son ki fiju mas pikininu ku kapli, ku sedu Akazias.

¹⁸ Dipus di kila tudu, SIÑOR manda riba del un duensa di ntistinus ku ka pudiba kuradu.

¹⁹ Nkuantu dias na pasa, i fika i na piora son, tok i kompleta dus anu. Si ntistinus sai pabia di ki duensa meduñu; asin ki muri ku dur forti. Si pobu ka sindil fugu pa onra si cur suma ke fasi pa si papes.

²⁰ I teneba trinta i dus anu oca ki yentra na renansa; i rena oitu anu na Jerusalen. I muri; ningin ka sinti pena del. E nteral na prasa di Davi, ma e ka pul na simiteriu di reis.