2 Kronikas 17 - BIBLIA - traduson antigu in Krioulo

Jeosafá, rei di Judá

¹ Jeosafá, fiju di Asa, i toma si lugar di renansa, i fortifika kontra Israel.

² I pui tropas na tudu prasas forti di Judá, i pui kuartelis na tera di Judá suma tambi na prasas di Efrain ku si pape Asa tomaba.

³ SIÑOR staba ku Jeosafá, pabia i yanda na kamiñu ku Davi, si pape, yandaba nel; i ka miti na kusas di Baal,

⁴ ma i buska Deus di si pape, i yanda konformi si mandamentus; i ka fasi kusas ku Israel ta fasiba.

⁵ SIÑOR konfirma renansa na si mon. Tudu Judá tisi pursentis pa Jeosafá; i bin ten manga di rikesa ku rispitu.

⁶ I ntrega si korson pa yanda na kamiñus di SIÑOR, i dana ki kaus altu na Judá, ku ki idulus di Aserá.

⁷ Na terseru anu di si renansa i manda si ŝefis Ben-Ail, Obadias, Zakarias, Netanel ku Mikaias, pa e ba ta nsina na prasas di Judá.

⁸ Utru levitas bai ku elis, ku sedu Semaias, Netanias, Zebadias, Asael, Semiramot, Jonatas, Adonias, Tobias ku Tob-Adonias; saserdotis Elisama ku Jeoran e staba ku elis tambi.

⁹ E leba libru di lei di SIÑOR, e yanda na tudu prasas di Judá, e na nsina pobu.

¹⁰ SIÑOR pui si medu riba di tudu nasons ku staba na roda di Judá; asin e ka lantanda gera kontra Jeosafá.

¹¹ Utru filisteus tisi pursentis pa Jeosafá, fora di prata pa paga mpustu. Jinti di Arabia e tisil limarias — 7.700 karnel macu ku 7.700 kabra macu.

¹² Asin, Jeosafá ngaña puder kada bias mas, i kumpu kuartelis ku prasas di armazens na Judá.

¹³ I rakada manga di feramentu di gera na prasas di Judá. Na Jerusalen i pui omis ku ten spiriensia di gera,

¹⁴ reẑistadu konformi familias di se papes. Adna seduba ŝef di tropas di familias di Judá, ku trizentus mil omi di gera na si konta.

¹⁵ Sugundu ŝef seduba Joanan, ku duzentus i oitenta mil;

¹⁶ dipus, Amasias, fiju di Zikri, ku duzentus mil omi di gera. (Amasias ofrisi di si libri vontadi pa sirbi SIÑOR.)

¹⁷ Ŝef di tropas di familias di Benjamin i seduba Eliada, omi di koraẑen, ku tenba konta di duzentus mil omi, yarmadu ku mansasas ku tajaderas.

¹⁸ Si sugundu i seduba Jeozabad, ku staba riba di sentu i oitenta mil omi yarmadu pa gera.

¹⁹ Esis e staba na sirvis di rei, fora di kilis ku rei pui na tudu prasas forti di Judá.