2 Kronikas 16 - BIBLIA - traduson antigu in Krioulo

Purblemas ku Israel

¹ Na anu 36 di renansa di Asa, Baasa, rei di Israel, bai kontra Judá, i fortifika prasa di Ramá, pa ka ningin sai nin yentra na tera di Asa, rei di Judá.

² Asa toma prata ku uru na armazens di kasa di Deus, ku kasa di rei, i mandal pa Ben-Adad, rei di Siria, ku moraba na Damasku, i falal:

³ “N misti pa i ten un kontratu entri nos, ami ku bo, suma ki tenba entri ña pape ku bu pape. Ali N na mandau prata ku uru; bai bu pajiga bu kontratu ku Baasa, rei di Israel, pa i pudi sai na ña tera.”

⁴ Ben-Adad seta palabra di rei Asa, i manda si kapitons di tropa kontra prasas di Israel. E toma prasas di Ijon, Dan, Abel-Main ku tudu prasas di armazens di Naftali.

⁵ Baasa obi ki noba, i disisti fortifika Ramá; i ka kontinua mas ku ki tarbaju.

⁶ Rei Asa leba tudu pobu di Judá, e bai karga ki pedras ku madera ku Baasa na fortifikaba Ramá ku el, e bai fortifika Jeba ku Mizpá ku el.

⁷ Na ki mesmu tempu, anunsiadur Anani bin pa Asa, rei di Judá, i falal: “Manera ku bu fiansa na rei di Siria, bu ka fiansa na SIÑOR bu Deus, tropas di rei di Siria kapliu.

⁸ Nta tropas di Etiopia ku Libia e ka seduba ciu dimas, ku ki manga di karu ku kabaleru? Ma suma ku bu fiansaba na SIÑOR, el i dau vitoria riba delis,

⁹ pabia uju di SIÑOR ta pasa pa tudu parti di mundu, pa fortifika kilis ku tene korson pirfitu pa el. Bu fasi kusa tulu; disna di gosi gera na ten kontra bo.”

¹⁰ Asa paña raiba kontra ki anunsiadur, i manda fical na kalabus, ku pe na tronku, pabia i fika abursidu ku ki palabra. Na ki mesmu tempu i kalka utru jinti ku duresa.

Mortu di Asa

¹¹ Kusas ku pasa ku Asa, disna di kumsada te na kabantada, e sta skritu na libru di Storia di Reis di Judá ku di Israel.

¹² Na anu 39 di si renansa, Asa bin paña duensa di pes, ku bin torna muitu mal. Mesmu asin, na si duensa i ka buska SIÑOR, son medikus.

¹³ Na anu 41 di si renansa i muri.

¹⁴ E ditandal na kama, ku inci ku kusas ku ta cera sabi ku jinti ku ta tarbaja na purfumus purpara. E nteral na prasa di Davi, na koba ki fasiba pa si kabesa; e sindi garandi fugu na si onra.