2 Kronikas 15 - BIBLIA - traduson antigu in Krioulo

Asa kaba ku idulatria

¹ Spiritu di Deus bin riba di Azarias, fiju di Obed.

² I sai pa bai kontra ku Asa, i falal: “Bo sukutan de, Asa ku tudu Judá ku Benjamin. SIÑOR sta ku bos nkuantu bo sta ku el. Si bo buskal, bo na ojal; si bo disal, el i na disa bos.

³ Pa manga di tempu Israel staba sin Deus di bardadi, sin lei, sin saserdoti pa nsina,

⁴ ma na se foronta e riba pa SIÑOR, Deus di Israel, e buskal, e ojal.

⁵ Na ki tempu i ka tenba suguransa pa kilis ku na fasiba bias; son turmenta na tudu ladu di ki teras.

⁶ Un pobu na lanta kontra utru, un prasa kontra utru, e na kalka ŋutru, pabia Deus kansa elis ku tudu koldadi foronta,

⁷ ma abos, bo sedu forti; ka bo fraksi bo mon, pabia bo tarbaju i na tene pagamentu.”

⁸ Oca ku Asa obi ki rekadu di Deus na boka di Azarias, fiju di Obed, i toma koraẑen, i tira tudu idulus nujenti di tudu tera di Judá ku Benjamin, suma tambi di prasas ki tomaba na montañas di Efrain. I torna kumpu altar di SIÑOR ku staba dianti di baranda di entrada di templu.

⁹ Manga di jinti di Efrain, Manasés ku Simeon e oja kuma SIÑOR si Deus staba ku el, e bin mora na Judá. Asa junta elis tudu ku Judá ku Benjamin.

¹⁰ E junta na Jerusalen na terseru mis di anu 15 di renansa di Asa.

¹¹ Na ki mesmu dia e sakrifika pa SIÑOR setsentus turu ku seti mil karnel, di ki limarias ke tisi di gera.

¹² E yentra na kontratu di buska SIÑOR, Deus di se papes, ku tudu se korson ku alma.

¹³ Kualker algin ku ka na buska SIÑOR, Deus di Israel, ten ku matadu, nin si i beju o i nobu, nin si i omi o i minjer.

¹⁴ E jurmenta pa SIÑOR; dipus e yalsa vos, e grita ku kontentamentu juntu ku toku di kornetas ku cifris.

¹⁵ Tudu jinti di Judá e kontenti ku ki juramentu, pabia e fasil di tudu se korson; e buska SIÑOR ku tudu se vontadi, e ojal. SIÑOR da elis diskansu na tudu ladu.

¹⁶ Rei Asa tira Maaka, si dona, pa ka i sedu mas raiña, pabia i kumpu un idulu nujenti pa adora Aserá. Asa dana ki idulu, i kebra-kebral, i kemal lungu di riusiñu di Sedron.

¹⁷ Mesmu ki ka dana ki kaus altu di Israel, ma, duranti tudu si vida, si korson staba pirfitu.

¹⁸ I tisi pa kasa di Deus kusas ku si pape dedika, tambi ku di sil ki dedika — prata, uru ku mas utru kusas.

¹⁹ I diskansa gera te na anu 35 di si renansa.