2 Kronikas 12 - BIBLIA - traduson antigu in Krioulo

Ejitu ataka Judá

¹ Oca ku Reoboan staba ja forti, ku si renansa konfirmadu, el ku tudu si pobu e bandona lei di SIÑOR.

² Na kintu anu di renansa di Reoboan, manera ke ka sedu fiel pa SIÑOR, Sisak, rei di Ejitu, i bin kontra Jerusalen

³ ku mil i duzentus karu, ku sesenta mil kabaleru. Tropas ku bin ku el di Ejitu e ciu tok e ka pudi kontadu, sukitas ku omis di Libia ku Etiopia.

⁴ I toma ki prasas forti di Judá, tok i bin ciga na Jerusalen.

⁵ Anunsiadur Semaias bai pa Reoboan ku ŝefis di Judá ku juntaba na Jerusalen pabia e tenba medu di Sisak, i fala elis: “Asin ku SIÑOR fala: ‘Abos bo disan; pabia di kila N na disa bos tambi na mon di Sisak.’ ”

⁶ Rei ku ŝefis e baŝa e fala: “SIÑOR i justu.”

⁷ Oca ku SIÑOR oja manera ke baŝa, i bin papia ku Semaias, i falal: “Suma ke baŝa, N ka na kaba ku elis. I ka na tarda, N na da elis manera di kapli. Ña raiba ka na darmadu pa mon di Sisak riba di Jerusalen,

⁸ ma e na fika bas di Sisak, pa e pudi rapara kal diferensa ki ten pa sirbin o pa sirbi reis di mundu.”

⁹ Sisak, rei di Ejitu, i bai ataka Jerusalen, i toma rikesas di kasa di SIÑOR ku rikesas di kasa di rei. I leba tudu, te ku ki tajaderas di uru ku Salomon kumpuba.

¹⁰ Rei Reoboan kumpu utru tajaderas di kobri, i pui na konta delis, i ntrega elis na mon di kapitons di guarda ku ta staba na porton di kasa di rei.

¹¹ Kada bias ku rei na yentra na kasa di SIÑOR, guardas ta lebaba elis; dipus e ta torna pui elis na kasa di guarda.

¹² Oca ki baŝa, raiba di SIÑOR bin pasa; SIÑOR ka bin kaba ku el, pabia na Judá i tenba inda bon kusas.

¹³ Rei Reoboan torna mas forti na Jerusalen, i kontinua na rena. I teneba korenta i un anu di idadi oca ki kumsa rena; i rena pa disaseti anu na Jerusalen, prasa ku SIÑOR kuji na metadi di tudu jorsons di Israel pa pui si nomi la. Si mame seduba minjer amonita comadu Naamá.

¹⁴ I ta fasiba kusas mau, pabia i ka pui sintidu pa buska SIÑOR.

¹⁵ Kusas ku Reoboan fasi, di kumsada te na kabantada, ku reẑistu di si jorson, e sta skritu na librus di Storia di Anunsiadur Semaias ku di Anunsiadur Idu. Gera tenba sempri entri Reoboan ku Jeroboan.

¹⁶ Reoboan diskansa ku si papes, i nteradu na prasa di Davi. Si fiju Abias toma si lugar suma rei.