2 Kronikas 11 - BIBLIA - traduson antigu in Krioulo

Deus tuji Reoboan fasi gera

¹ Oca ku Reoboan ciga na Jerusalen, i junta sentu i oitenta mil omi ku sibi geria, di jorsons di Judá ku Benjamin, pa geria kontra ki utru jorsons di Israel, pa torna renansa na mon di Reoboan.

² Ma SIÑOR bin papia ku Semaias, omi di Deus, i falal:

³ “Bai papia ku Reoboan, fiju di Salomon, rei di Judá, ku tudu Israel ku mora na Judá ku Benjamin, bu fala elis

⁴ kuma SIÑOR fala: ‘Ka bo bai geria kontra bo ermons, pabia i ami ku fasi e tarbaju. Kada kin pudi riba pa si kasa.’ ” E obi ke ku SIÑOR fala, e disa, e ka bai kontra Jeroboan.

Reoboan fortifika prasas

⁵ Reoboan mora na Jerusalen, i fortifika utru prasas di Judá pa difesa:

⁶ Belen, Etan, Tekoa,

⁷ Bet-Zur, Sokó, Adulan,

⁸ Gat, Maresa, Zif,

⁹ Adorain, Lakís, Azeka,

¹⁰ Zorá, Aijalon ku Ebron. Utrus de prasas forti staba na Judá, utrus na Benjamin.

¹¹ I fortifika se kuartelis, i pui kapitons nelis, ku armazens di kumida, azeiti ku biñu.

¹² I pui tajaderas ku kañakus na kada un delis; i fortifika elis diritu. Asin Judá ku Benjamin fika na si puder.

Kilis ku misti yanda ku Deus e bai pa Jerusalen

¹³ Saserdotis ku levitas di tudu parti di Israel e bai pa ladu di Reoboan.

¹⁴ Levitas disa se kaus di bakia ku se terenu, e bin pa Judá ku Jerusalen, pabia Jeroboan ku si fijus tira elis na se sirvis ke ta fasiba pa SIÑOR,

¹⁵ i ranja si propi saserdotis pa kaus altu sagradu, pa kultus di dimonius ku di idulus di bakasiñus ki kumpu.

¹⁶ Di tudu jorsons di Israel, kilis ku pui sintidu pa buska SIÑOR Deus di Israel e bai pa Jerusalen, pa pursenta sakrifisius pa SIÑOR Deus di se papes.

¹⁷ E fortifika renu di Judá, e apoia Reoboan, fiju di Salomon, e yanda na kamiñu di Davi ku Salomon pa tris anu.

Familia di Reoboan

¹⁸ Reoboan kasa ku Maalat, fiju di Jerimot, fiju di Davi. Mame di Maalat seduba Abiail, fiju di Eliab, fiju di Jesé.

¹⁹ I padi tris fiju ku el: Jeus, Semarias ku Zaan.

²⁰ Dipus i kasa ku Maaka, fiju femia di Absalon; e padi Abias, Atai, Ziza ku Selomit.

²¹ Reoboan teneba disoitu minjer ku sesenta kumadri, i padi ku elis vinti i oitu fiju macu ku sesenta femia. Na tudu si minjeris ku kumadris i mas amaba Maaka, fiju di Absalon,

²² i kuji si fiju Abias, i fasil ŝef na metadi di si ermons, pabia i mistiba pa i bin sedu rei.

²³ I usa jiresa, i pajiga si fijus macu, i da elis lugar na ki prasas forti na tera di Judá ku Benjamin; i da elis manga di kumida, tambi i ranja manga di minjer pa e kasa ku elis.