2 Kronikas 10 - BIBLIA - traduson antigu in Krioulo

Des jorson lanta kontra rei

¹ Reoboan bai pa Siken, pabia tudu Israel baiba ja la pa fasil rei.

² Jeroboan, fiju di Nebat, staba na Ejitu, nunde ki kuriba pa kapli di rei Salomon. Oca ki obi noba, i riba di Ejitu.

³ Jinti manda comal. El ku tudu Israel e bai papia ku Reoboan, e falal:

⁴ “Bu pape kastiganu ku kargu pisadu. Gosi ja, bu ta rapati ki tarbaju kansadu ku ki kargu pisadu ku bu pape pui riba di nos. Asin no ta sirbiu.”

⁵ Reoboan fala elis: “Bo bai pera tris dia, bo riba pa mi.” Asin jinti bai.

⁶ Rei Reoboan bai konsulta ideia di garandis ku ta konsijaba si pape Salomon ocal bibu, i punta elis: “Kal ki bo konsiju pa mi pa N pudi ruspundi e pobu?”

⁷ E falal: “Si bu mostra bondadi pa e pobu, bu fasi elis kontenti ku bon palabra, elis e ta sedu bu servus pa sempri.”

⁸ Ma Reoboan ka seta konsiju di ki garandis; i bai pa si kolegas ki kriadu juntu ku elis, ku seduba ja si konsijaduris, i konsulta elis se ideia.

⁹ I punta elis: “Kuma ku bo na konsijan? Kuma ku no na ruspundi e pobu ku falan pa N rapati ki kargu pisadu ku ña pape pui riba delis?”

¹⁰ Si kolegas falal: “Si bu na ruspundi e pobu ku falau kuma bu pape pui elis kargu pisadu dimas, ma pa bu rapati ki kargu, bu ta fala elis: ‘Ña dedu pikininu i mas gros di ki rabada di ña pape.

¹¹ Si ña pape karganta bos kusa pisadu, ami N na buri bo kargu. Ña pape suta bos ku ŝikoti; ami N na kastiga bos ku lakaran!’ ”

¹² Na terseru dia, Jeroboan ku tudu pobu riba nunde Reoboan, suma ki falaba elis.

¹³ Rei Reoboan ruspundi pobu ku palabra duru, pabia i negaba konsiju ku garandis dalba.

¹⁴ I papia ku elis konformi konsiju di jovens; i fala elis: “Ña pape kastiga bos ku kargu pisadu, ma ami, N na buri bo kargu. Ña pape suta bos ku ŝikoti, ma ami, N na kastiga bos ku lakaran.”

¹⁵ Asin, rei ka sukuta ke ku pobu na fala, pabia SIÑOR mistiba e mudansa pa kumpri palabra ki falaba ja ku Jeroboan, fiju di Nebat, pa boka di Aías di Siló.

¹⁶ Oca ku tudu israelitas oja kuma rei ka na sukuta se palabra, e rabida e ruspundil, e punta: “Ke ku no ten ku Davi? Yardansa ka ten pa nos na fiju di Jesé! Omis di Israel, bo bai pa bo kasas! Davi, jubi pa bu propi kasa!” Asin tudu Israel bai pa se kasas.

¹⁷ Reoboan fika i rena riba di ki fijus di Israel ku mora na prasas di Judá.

¹⁸ Rei Reoboan manda Adoniran, ku staba riba di tarbaju obrigatoriu, ma fijus di Israel dal ku pedra tok i muri. Rei Reoboan janti, i mbarka na si karu, i kuri pa Jerusalen.

¹⁹ Asin israelitas disliga ku renansa di jorson di Davi te aos.