2 Koríntius 9 - BIBLIA - traduson antigu in Krioulo

¹ Na bardadi i ka pirsis pa N skirbi bos di oferta ku na mandadu pa krentis di Jerusalen,

² pabia N sibi kuma bo sta pruntu. E ku manda N ngaba bos dianti di jinti di Masedonia; N fala elis kuma jinti di Akaia sta pruntu disna di anu pasadu. Bon vontadi di bos disperta korson di manga delis.

³ N na manda e ermons, pa kil ku no fala di bos aserka de oferta ka i bin sedu palabra di bentu. Asin N misti pa bo sta purparadu, suma ku N fala elis.

⁴ Si jinti di Masedonia bai ku mi, e ka oja bos purparadu, i garandi borgoña pa nos, pa fiansa ku no mostra na bos. Abos tambi bo ta burguñu.

⁵ E ku manda N oja kuma N dibi di pidi e ermons pa e bai dianti pa bos, pa jubi ki oferta ku bo fala bo na da, pa i sta pruntu antis di N bai. Asin si i sta tudu pruntu, i ta mostra kuma bo da di bo vontadi, i ka a forsa.

⁶ Lembra kuma kil ku sumia puku, i ta oja puku. Kil ku sumia ciu i ta oja tambi ciu.

⁷ Kada un ta da konformi i sinti na si korson; i ka ku tristesa, nin pa obrigason, pabia Deus ama kil ku da ku alegria.

⁸ Deus pudi darma si benson ciu riba di bos, tok bo ka ta ten falta di nada na bo vida; ki ta sobra sempri pa juda utru jinti.

⁹ Konformi i sta skritu: “I yabri si mon ciu, i da koitadis; si bondadi ta fika pa sempri.”

¹⁰ Deus ku ta da simentera pa kil ku na sumia, ku pon pa kume, tambi i ta da bos kusa di sumia, i ta buril, tok bo bondadi i ta da manga di frutu ku na riba pa bos.

¹¹ Asin sempri Deus na da bos kil ku ciga pa bo pudi rapati ciu ku utru jinti, ku ta pui elis pa e gardisi Deus pa bo oferta ke risibi di no mon.

¹² E tarbaju i ka son pa juda na falta ku pobu di Deus ten, ma tambi i ta darma na manga di gardisimentu pa Deus.

¹³ E tarbaju ta proba kuma, na bardadi, bo ta obdisi Bon Noba di Kristu; i ka son setal ku boka. Pabia di kila, e ta glorifika Deus; e ta glorifikal tambi pa ki garandi oferta ku bo manda pa elis ku tudu jinti.

¹⁴ Elis e na ora pa bos ku garandi amor, pabia di rikesa di grasa ku Deus pui na bos.

¹⁵ Deus obrigadu pa garandi kusa ki danu ku no ka pudi konta!