2 Koríntius 8 - BIBLIA - traduson antigu in Krioulo

Oferta pa krentis koitadi na Judeia

¹ Ermons, no misti konta bos di grasa ku Deus da na igreẑas di Masedonia,

² manera ke pasa manga di proba di foronta, ma e tenba garandi alegria, tok e yabri se mon pa da ciu, kontudu elis e koitadi.

³ N ta konta bos kuma e da tudu kil ke pudi, inda mas di ki kil ke teneba pa da.

⁴ Di se libri vontadi e pidinu ciu pa no disa elis e ten parti na ajuda pa krentis di Jerusalen.

⁵ Se oferta i mas ba kil ku no kuda, pabia purmeru e ntrega se kurpu pa Deus, pa nos tambi, na vontadi di Deus.

⁶ Asin no pidi Titu, ku kumsa e garandi tarbaju di da, pa i bai juda bos pa kompletal.

⁷ Bo sedu riku na tudu — na fe, na palabra, na kuñisimentu, na pruntidon pa juda, na bo amor pa nos. Tambi no misti pa bo sedu bon na da.

⁸ N ka na da ordi, ma N na konta kuma ku utrus sta pruntu pa juda, pa N jubi si bo amor i di bardadi.

⁹ Bo sibi kuma no Siñor Jesus Kristu staba pruntu pa da. El i seduba riku, ma pa amor di bos i bida pobri, pa i pudi fasi bos riku pabia di si pobresa.

¹⁰ Es i ña opinion. I abos ku kumsa purmeru e tarbaju na anu pasadu. Bo mostraba garandi vontadi pa el. Agora N oja kuma i bon

¹¹ pa bo kompleta kil ku bo kumsa, pa bo tene ki mesmu vontadi pa kabantal suma ku bo teneba pa kumsal. Bo da kil ku bo tene.

¹² Si bo sta ku vontadi di da, Deus ta seta kil ku bo tene; i ka na pidi bos kil ku bo ka tene.

¹³ N ka na buska pui kargu riba di bos pa libra utrus,

¹⁴ ma N misti pa bo justa. Gosi, suma bo tene ciu, bo pudi juda kilis ku ten falta. Mas dianti, si bo ten falta, si e tene ciu, e ta juda bos tambi. Asin bo ta justa tudu.

¹⁵ Suma ku Skritura fala: “Kil ku oja ciu i ka sobra; kil ku oja puku i ka falta.”

¹⁶ No na fala Deus obrigadu manera ki pui mesmu diseẑu na korson di Titu suma no ten, pa juda bos.

¹⁷ I ka son kuma i seta no pididu, ma i staba ku garandi diseẑu. I na bai ku si libri vontadi pa bos.

¹⁸ Juntu ku el no na manda un ermon di garandi rispitu na tudu igreẑa, pabia di konta Bon Noba.

¹⁹ I ka son es, ma tambi igreẑas kujil pa i sedu no kumpañer na bias pa leba e oferta pa gloria di Siñor, pa mostra no bon vontadi pa juda.

²⁰ No misti toma sintidu na manera ku no na trata ku e manga di oferta, pa libra kritika na nos.

²¹ No ta buska fasi tudu ki retu; i ka son dianti di Siñor, ma tambi dianti di jinti.

²² No na manda utru ermon ku elis ku manga di bias no proba; i sta sempri pruntu pa juda. Gosi i sta ku mas vontadi di juda inda, pa garandi fiansa ki ten na bos.

²³ Si bo misti sibi kusa di Titu, el i ña kumpañer na tarbaju pa juda bos. De utru ermons ku na bai ku el, elis i delegadus di igreẑa, e ta tisi onra pa Kristu.

²⁴ Asin bo ta mostra bo amor pa elis, pa tudu igreẑa pudi sibi del; e ta ntindi kuma N tenba roson di ngaba bos.