2 Koríntius 5 - BIBLIA - traduson antigu in Krioulo

No futuru morada na seu

¹ No sibi kuma, ora ku no tenda, ku sedu no kurpu di reia, kai, Deus ten un morada na seu pa nos, ku ka ta dana mas, kasa ku ka kumpudu ku mon di omi.

² Ne no kurpu li no na jimi, ku garandi vontadi pa no bistidu ku no morada di seu.

³ Si no bistidu el, no ka na ojadu nun.

⁴ Nkuantu no tene e tenda di tera, no na jimi, suma ku no na kalkadu; i ka suma no misti pa no dispidu e kurpu beju, ma pa no buri bisti di ki nobu, pa kurpu ku ta muri ngulidu pa vida.

⁵ I Deus propi ku purparanu pa e mudansa; i danu si Spiritu pa i sedu no garantia.

⁶ E ku manda no sta sempri animadu. No sibi kuma, nkuantu no mora ne kurpu li, no ka ta sta juntu ku Siñor.

⁷ No na yanda na fe, i ka na kil ku no na oja.

⁸ No ten konfiansa; no mas misti disa e kurpu ku no mora nel pa sta juntu ku Siñor.

⁹ Kusa ku no mas misti i pa no agradal, tantu na kurpu suma dipus di no muri,

¹⁰ pabia anos tudu no ten ku parsi dianti di tribunal di Kristu, pa kada kin risibi konformi i fasi na kurpu, ben o mal.

Amisadi ku Deus

¹¹ Suma no sibi kuma ku Siñor dibi di rispitadu, no ta misti konvensi jinti. Deus kunsinu diritu; no na pera kuma abos tambi bo kunsinu diritu dentru di bo korson.

¹² I ka suma no na rekumenda no kabesa utru bias pa bos, ma i pa no da bos manera di njata pabia di nos, pa bo tene rasposta pa da kilis ku na ngaba jinti son pabia di parsensa di fora, i ka di dentru.

¹³ Si no tulu, i pa Deus; si no ten juisu, i pa bos.

¹⁴ Amor di Kristu ta pincanu, suma ku no ntindi kuma un omi muri pa tudu jinti; asin tudu ten parti na si mortu.

¹⁵ I muri pa tudu, pa tudu kilis ku na vivi, pa e ka vivi mas pa se kabesa, ma pa kil ku muri pa elis, i torna vivi.

¹⁶ Gosi no ka ta jubi jinti suma ku jinti di mundu ta jubi. Kontudu no ta jubiba Kristu suma ku jinti di mundu ta jubi, ma gosi no ka na jubil asin.

¹⁷ Si algin liga ku Kristu, i ta sedu nobu algin. Kusas beju pasa ja; tudu vida bida nobu.

¹⁸ I Deus ku fasi tudu e tarbaju. El, pabia di Kristu, i fasinu si amigus, i danu tarbaju di fasi utrus si amigus.

¹⁹ Kil ku no misti fala i di kuma, Deus staba na Kristu pa fasi tudu jinti di mundu ten pas ku el. I ka na rakada mal ke fasi. I mandanu pa no konta palabra di kuma ke pudi sedu si amigus.

²⁰ Asin, no bin suma mbaŝadur di Kristu. I suma ki Deus propi ku na roga bos ku no boka. No pidi bos, na nomi di Kristu, pa bo fasi pas ku Deus.

²¹ Kil ku ka fasi pekadu nunka, Deus fasil pa i sedu pekadu pabia di nos, pa no pudi sedu justu suma Deus, na no union ku Kristu.