2 Koríntius 3 - BIBLIA - traduson antigu in Krioulo

¹ Nta no ten ku kumsa utru bias ngaba no kabesa? O, suma utru jinti, no pirsisa di karta di rekumendason pa bos, o di bos?

² Abos propi i no karta, skritu na no korson, ku tudu jinti pudi kunsi, e lei.

³ I pudi ojadu kuma abos i un karta ku Kristu skirbi, i manda pa no mon pa no ntrega. I ka skirbidu ku tinta, ma ku Spiritu di Deus bibu. I ka na tagua di pedra ma na karni di korson.

⁴ No fala asin pa fiansa ku no ten na Deus pabia di Kristu.

⁵ I ka ten nada na nos ku ta punu pa no fala kuma no sedu kapas di fasi kualker kusa. Puder ku no ten i ta bin di Deus.

⁶ I el ku fasinu kapas di konta jinti aserka di nobu kontratu, ku ka sedu lei skritu, ma di Spiritu. Lei ku skirbidu i ta mata, ma Spiritu ta da vida.

⁷ Lei ku gravadu letra pa letra na tagua di pedra i tisi mortu, ma gloria di Deus parsiba na ki ora ku lei dadu. Ki gloria, kontudu i staba pa pirdi, ma i pui rostu di Moisés lampra tok pobu di Israel ka pudi jubil diritu. Si lei dadu ku ki garandi gloria,

⁸ kuma ku tarbaju di Spiritu ka na ten muitu mas gloria?

⁹ Si puder ku tisi kondenason tenba gloria, puder ku ta fasinu justu i ten muitu mas gloria.

¹⁰ Pabia di gloria mas garandi di gosi, ki gloria ku na lampraba purmeru i fusku.

¹¹ Si kil ku ka tarda ciu i tenba gloria, kuma ku kil ku ka na kaba ka na ten gloria mas ciu?

¹² No papia ku koraẑen pabia no ten e speransa.

¹³ No ka sta suma Moisés ku kubriba rostu ku veu, pa ka pobu di Israel ojaba manera ku gloria na disparsi nel.

¹⁴ Se ntindimentu staba ficadu, pabia, te aos, se ntindimentu sta kubridu ku ki mesmu veu ora ku libru di Beju Testamentu leidu; son Kristu ku pudi kaba ku ki veu.

¹⁵ Te aos, ora ku libru di Moisés leidu, ki veu ta sta riba di se ntindimentu,

¹⁶ ma ora ku algin konverti pa Siñor, veu ta tiradu.

¹⁷ Agora, Siñor ku e palabra fala del, i Spiritu. Nunde ku Spiritu di Siñor sta, liberdadi sta la.

¹⁸ Anos tudu ku rostu diskubertu, suma un spiju, no ta mostra gloria di Siñor. Asin Siñor, ku sedu Spiritu, i ta transformanu di un gloria pa utru mas garandi, tok no ta tene si parsensa.