2 Koríntius 2 - BIBLIA - traduson antigu in Krioulo

¹ Asin N rezolvi pa N ka bai mas nunde bos ku tristesa,

² pabia, si N fasi bos tristi, kin ku ta dan alegria, si i ka kilis ku N fasi tristi?

³ E ku manda N skirbi bos ki karta. N ka mistiba bai la, pa jinti ku dibi di fasin alegri pa e fasin tristi. N fiansa kuma, si ami N sta kontenti, abos tudu bo ta sta kontenti tambi.

⁴ N skirbi bos ku korson fadigadu ku tristesa, ku manga di larma. I ka pa bo fika tristi, ma i pa bo pudi sibi kuma ku N kiri bos ciu dimas.

Purdon pa kil ku yara

⁵ Ki algin ku tisi e kansera, i ka ami ki pui mas tristi, ma i pui kasabi pa bos tudu, o pelu menus, pa utrus na bo metadi, pa N ka pasanta palabra. N ka misti sedu risu dimas ku el;

⁶ kastigu ku mas parti di bos dal i justal.

⁷ Gosi bo dibi di purdal, bo animal, pa ka i fika ku garandi tristesa tok i disanima dimas.

⁸ N pidi bos pa bo mostral ki garandi amor ku bo ten pa el.

⁹ N skirbi bos pa N jubi kuma ku bo sufri e proba, si bo ta obdisin na tudu ku N fala.

¹⁰ Si bo purda algin kualker ofensa, ami tambi N purdal. Ora ku N purda (si kontra i ten kualker kusa pa N purda), N fasil dianti di Kristu pabia di bos, pa ka Satanas bin ten forsa riba di nos,

¹¹ pabia no sibi kal ki si planu mau.

¹² Oca ku N ciga Troas pa konta Bon Noba di Kristu, N oja kuma Siñor yabriba kamiñu pa N tarbaja la.

¹³ N staba tarpajadu dentru di mi suma ku N ka oja ña ermon Titu la. E ku manda N dispidi elis, N bai pa Masedonia.

Tarbaju di Paulu

¹⁴ No pudi fala Deus obrigadu, el ku ta lebanu suma katibu di vitoria di Kristu. I ta usanu pa no fasil kunsidu na tudu parti suma purfumu ku na spaja,

¹⁵ pabia no sedu suma ki ceru sabi di nsensu ku Kristu na kema pa Deus. Kilis ku na salba, tudu ku kilis ku na pirdi, e na sinti ki ceru.

¹⁶ Pa kilis ku na pirdi i suma un ceru fedi ku ta mata, ma pa kilis ku na salba i un purfumu di saudi ku ta da vida. Kin ki kapas pa e tarbaju li?

¹⁷ No ka sta suma manga di utru jinti ku ta konta palabra son ku interes di ngaña, ma dianti di Deus no ta fala di Kristu na bardadi, suma ku Deus mandanu.