2 Koríntius 13 - BIBLIA - traduson antigu in Krioulo

¹ Es gora i terseru bias ku N na bai nunde bos. N na konta bos kuma, kualker akusason i ten ku sedu probadu pa boka di dus o tris tustumuña, suma ku palabra di Deus fala.

² Sugundu bias ku N bai, N avisa bos un kusa oca N staba la. Gosi ku N ka sta la, N na torna avisa kilis ku tarda peka, ku tudu utru jinti, kuma si N torna bai, N ka na diskulpa elis.

³ Bo na ten tudu proba ku bo misti kuma Kristu ta fala na ña boka. El i ka fraku pa bos, ma i ta mostra si puder na bo metadi.

⁴ Bardadi, i muri na krus na frakesa, ma gosi i na vivi na puder di Deus. Anos ku ten parti na si frakesa, no na vivi ku el na puder di Deus pa sirbi bos.

⁵ Bo jubi bo kabesa, bo julga si bo na vivi na fe inda. O bo ka sibi kuma Jesus Kristu sta na bos? O son si bo raproba ja.

⁶ Ma N spera kuma bo na bin sibi kuma anos no ka raproba.

⁷ No na ora Deus pa ka bo fasi nin un mal. I ka pa no parsi kuma no ka raproba, ma i pa bos bo fasi ben, nin ku no parsi suma no raproba.

⁸ No ka pudi fasi nada kontra bardadi, ma no pudi fasi son na fabur di bardadi.

⁹ No ta kontenti si no sta fraku, abos bo sta forti. El ku no ta pidi Deus, pa i kabanta fasi bos krentis maduru.

¹⁰ E ku manda N skirbi e kusas suma ku N ka sta la, pa, ora ku N bai, pa ka i pirsis pa N trata bos ku duresa, konformi otridadi ku Siñor dan. I dan el pa N kumpu; i ka pa dana.

¹¹ Mbon ermons, N na dispidi bos. Bo kontenti, bo sedu pirfitu, bo seta ña pididu, bo konkorda ku ŋutru, bo vivi na pas. Deus di amor ku ta da pas i ta sta ku bos.

¹² Bo fala ŋutru manteña ku beẑu santu. Tudu pobu di Deus manda bos manteña.

¹³ Fabur di Siñor Jesus Kristu, ku amor di Deus, ku kumuñon di Spiritu Santu, ta sta ku bos tudu. Amen.