2 Koríntius 12 - BIBLIA - traduson antigu in Krioulo

Vison di Paulu

¹ I pirsis pa N njata, nin ki ka ten purbitu, ma N na pasa pa konta kusa ku Siñor mostran, i kontan.

² N kunsi un omi di Kristu ku ten katorzi anu ki rabatadu pa terseru seu. Si i na kurpu o fora di kurpu N ka sibi, ma Deus sibi.

³ N sibi kuma ki omi (si i na kurpu o fora di kurpu N ka sibi, ma Deus sibi)

⁴ kuma i rabatadu pa Paraísu, i obi palabra sukundidu ku boka di omi ka pudi konta.

⁵ Aserka de omi N pudi njata, ma di mi propi N ka na njata; son na kusas ku ta mostra ña frakesa ku N pudi njata.

⁶ Si N mistiba njata, N ka na sedu tulu, pabia N na kontaba kil ki bardadi, ma N na disa, pa ka ningin kuda di mi mas di ki kil ki na oja na mi, o ki na obi na ña boka.

⁷ Pa ka N pudi inci di garandesa pabia di kusa garandi ku Deus mostran, N dadu un kusa ku N pudi fala “fidida na ña kurpu”, ku Satanas ta manda pa bofotian, pa ka N pudi yalsa kabesa dimas.

⁸ Tris bias N ora Siñor aserka del, pa i tiran el,

⁹ ma i falan kuma si grasa justan, pabia si puder i ta mas sta kompletu si N sta fraku. Asin, N ta kontenti pa njata na ña frakesa, pa puder di Kristu pudi sta riba di mi.

¹⁰ N ta sinti alegria na ña frakesa, na njuria, na falta, na pirsigison, na kasabi, tudu pa amor di Kristu. Ora ku N sta fraku, la ku N ta sedu mas forti.

Kudadi di Paulu pa koríntius

¹¹ N fasi suma tulu manera ku N ngaba ña kabesa, ma abos ku obrigan pa N fasi asin. Abos ku dibi di ngabanba. Nin ku N ka sedu nada, ma N ka sta mas bas di ki ki bo garandi apostolus!

¹² Ki manga di sinal ku milagri ku maravilya ku N fasi bo dianti, ku garandi pasensa, e ta proba kuma N sedu apostolu.

¹³ Na kal manera ku bo tratadu mas pior di ki utru igreẑas? I pabia N ka kume na bo kusta? Garandi mal ku N fasi! Bo purdan!

¹⁴ Ali N sta pruntu pa bai visita bos terseru bias. N ka na kume na bo kusta, pabia N ka na buska kil ki di bos, ma bos propi. I ka fiju ku ta junta kusas pa papes, ma i papes ku ta junta pa fijus.

¹⁵ N ta kontenti pa gasta tudu ku N tene, te ña kurpu, pa juda bos. N na ama bos kada bias mas; N dibi di sedu menus amadu tambi?

¹⁶ Bo na seta kuma N ka pisadu pa bos, ma algin na fala kuma N seduba jiru; N paña bos ku nganu.

¹⁷ Nta N splora bos ku kualker di kilis ku N manda bos?

¹⁸ N roga Titu pa i visita bos; N manda ki utru ermon ku el. Nta Titu splora bos? No ka na yanda na mesmu spiritu? No ka na fasi di mesmu manera?

Ultimu avisu ku manteña

¹⁹ Talves tudu e tempu bo kuda kuma no misti difindi dianti di bos, ma no na fala dianti di Deus, suma algin di Kristu. Tudu ku no na fasi i pa juda kumpu bos.

²⁰ N ten medu pa, ora ku N ciga, N ka bai oja bos suma ku N misti; pa ka abos tambi bo ojan na manera ku bo ka misti; pa ka i ten jus na bo metadi, ku nveẑa, raiba, junda-junda, rui, sibi di vida di utru jinti, garandesa ku jumbulumani.

²¹ N ten medu pa, ora ku N bai, ña Deus i na rebaŝan bo dianti, tok N ta cora riba di kilis ku tarda peka, e ka ripindi di se susidadi, ku mau vida, ku pekadu seksual ke fasi.