2 Koríntius 11 - BIBLIA - traduson antigu in Krioulo

Apostolus finjidu

¹ N misti pa bo ten pasensa ku mi, nin ku N sedu un bokadu tulu. Bo ten pasensa un bokadu.

² N ten siumi di bos suma Deus ten propi, pabia N purpara bos pa pursenta bos suma virẑen puru pa un maridu son, ki Kristu.

³ N ten medu pa ka bo pensamentu dana, pa bo bandona ki amor puru ku bo ten pa Kristu, suma ku serpenti ku si astusia ngana Eva,

⁴ pabia si algin bin, i konta bos aserka di utru Jesus fora di kil ku no konta aserka del, o si bo risibi utru spiritu fora di kil ku bo risibi ja, o utru Bon Noba ku ka juntu ku kil ku bo seta ja, bo ta ngulil ku kontentamentu!

⁵ N oja kuma ki bo garandi apostolus e ka mas mi na nada.

⁶ Nin ku N ka sedu garandi papiadur, ma N ten kuñisimentu. No proba es klaru pa bos manga di bias, na tudu manera.

⁷ Nta es i seduba ña kulpa suma ku N ka kobra bos pa konta Bon Noba di Deus, ma N baŝa ña kabesa pa N pudi lantanda bos?

⁸ Na bardadi, oca ku N na tarbaja na bo metadi, i utru igreẑas ku pagan. I suma N na roba elis pa juda bos! Oca ku N staba la, si N ka tene, N ka ta pidi ningin pa judan.

⁹ Ermons ku bin di Masedonia e judan na ña falta. Na tudu N libra di sedu pisadu pa bos; N na kontinua libra inda.

¹⁰ Es i sertu, suma ku bardadi di Kristu sta na mi, N na kontinua njata ne puntu pa tudu ladu di Akaia. Ningin ka ta tujin.

¹¹ Nta N fala asin pabia N ka misti bos? Deus sibi kuma N misti bos.

¹² N na kontinua fasi kil ku N na fasi, pa taja kamiñu di kilis ku na buska manera di njata, pa fala kuma se tarbaju i suma di nos.

¹³ Ki koldadi jinti i apostolus finjidu, ku ta tarbaja ku nganu; e na finji kuma e sedu apostolus di Kristu.

¹⁴ I ka di dimira, pabia Satanas propi i ta finji kuma i sedu anju di lus.

¹⁵ Asin tambi i ka garandi dimas si si servus na finji pa parsi servus di ben, ma se fin i ta sedu konformi kil ke fasi.

Sufrimentu di Paulu

¹⁶ N na ripiti utru bias: Ka ningin oja kuma N tulu, ma si algin kuda asin, bo ta risibin mesmu ku N tulu, pa N pudi njata tambi un bokadu.

¹⁷ Ne kusa di ngaba ña kabesa, N ka na papia suma ku Siñor misti, ma suma tulu.

¹⁸ Suma ku manga di utru jinti na njata na se puder, ami tambi N ta njata.

¹⁹ Suma abos bo jiru, bo ta nguenta tulus ku kontentamentu!

²⁰ Kualker algin ku na forsija bos, ku na kume bos, ku na paña bos, ku ta yalsa ombra riba di bos, ku na bofotia bos, bo ta nguental.

²¹ N burguñu fala kuma no fraku dimas! Na kil ku algin ten koraẑen di fala (N na fala suma tulu), ami tambi N ten koraẑen.

²² E sedu ebreu? Ami tambi. E sedu israelita? Ami tambi. E sedu di jorson di Abraon? Ami tambi.

²³ E ta sirbi Kristu? N na fala suma ku N sta fora di mi, ma ami N ta sirbil mas. N mas tarbaja di ki elis; N sutadu mas di ki elis; N mas pudu prezu di ki elis; manga di bias N staba na pirigu di mortu.

²⁴ Sinku bias judeus dan trinta i novi ŝikotiada;

²⁵ tris bias N sutadu ku po; un bias N dadu ku pedra; N foga tris bias, N pasa un noti ku un dia na mar largu.

²⁶ Na manga di bias ku N fasi, N staba na pirigu di riu, pirigu di bandidus, pirigu di kilis di ña rasa ku di utru rasa, pirigu na prasa, pirigu na matu, pirigu na mar, pirigu na metadi di ermons finjidu.

²⁷ N tarbaja ku fadiga, manga di bias sin durmi, ku fomi, ku sedi. N junjuŋa manga di bias; N sufri friu ku falta di ropa.

²⁸ Fora de kusas ku N pasa na kurpu, kudadi di tudu igreẑas i na pesa riba di mi kada dia.

²⁹ Kin ku fraksi ku ami tambi N ka sinti fraku? Si algin pudu pa i kai, ña korson tambi ta kinti.

³⁰ Si i pirsis njata, N ta njata na kusas ku mostra ña frakesa.

³¹ Deus, Pape di no Siñor Jesus, ku ta ngabadu pa sempri, i sibi kuma N ka na konta mintida.

³² Ocan na Damasku, kil ku na gubernaba bas di rei Aretas i puiba guardas na porton di prasa pa prindin.

³³ Ma N riantadu na janela di mura dentru di balai; asin N kapli di si mon.