2 Koríntius 10 - BIBLIA - traduson antigu in Krioulo

Paulu na difindi si otridadi

¹ Ami Paulu, N na roga bos, ami ku jinti fala kuma, ora ku N sta ku bos, N ta mansu, ma si N sta lunju, N ta sedu brabu pa bos. N na pidi bos, pa mansesa ku bondadi di Kristu,

² ka bo obrigan, ora ku N bai la, pa N sedu brabu. N sibi sertu kuma N pudi sedu brabu ku kilis ku fala kuma no ta fasi kusa suma jinti di mundu.

³ Nin ku no sta na mundu, ma no gera i ka suma di mundu.

⁴ Armas ku no ta geria ku el e ka sedu suma kilis di mundu, ma i arma ku ten puder di Deus pa kebra muras forti.

⁵ No ta pajiga pensamentu falsu, ku tudu njatamentu di orgulyu ku ta lanta kontra kuñisimentu di Deus. No ta obriga kada pensamentu pa i fika bas di Kristu.

⁶ Ora ku bo sta pruntu pa obdisi, no sta tambi pruntu pa kastiga tudu disobdiensia.

⁷ Bo na jubi pa kusas suma ki ta parsi. Si i ten algin la ku fiansa kuma el i di Kristu, pa i pensa utru bias na si kabesa. Suma ki sedu di Kristu, asin tambi ku no sedu.

⁸ Nin ku N njata ciu pabia di otridadi ku Siñor dan pa N juda bos (i ka pa dana), N ka na burguñu.

⁹ N ka misti pa i parsi kuma N na miti bos medu ku ña kartas.

¹⁰ Utru jinti ta fala: “Si karta forti, i pisadu, ma ora ki sta juntu ku nos i ka ta ten nin forsa; si palabra ka ta ten balur.”

¹¹ Algin ku papia asin i dibi di ntindi kuma, si N bai, ña manera ten ku sedu suma ku N skirbi na karta antis di N bai nunde bos.

¹² No ka osa justanda no kabesa nin komparal ku kilis ku ta yalsa se kabesa. Elis e tulu. E ta ranja se midida; e ta midi se kabesa, pa komparal ku se midida propi.

¹³ Pa nos, no njatamentu i ka na pasa sertu limiti. I na fika dentru di limiti di tarbaju ku Deus marka pa nos. No tarbaju na bo metadi sta dentru di ki midida.

¹⁴ Suma ku bo sta dentru de marka, no ka pasantal oca no ciga nunde bos pa konta Bon Noba di Kristu.

¹⁵ No ka ta njata na tarbaju ku utru jinti fasi fora di lugar ku Deus markanu, ma no na pera, suma ku bo fe na kirsi, ku no pudi fasi tarbaju muitu mas garandi na bo metadi, ma sempri dentru di ki midida ku Deus markanu.

¹⁶ Dipus, no ta pudi leba Bon Noba pa tera mas dianti di bos, ma i ka na lugar di utru algin. Asin no ka ta njata na kil ku utru fasi ja.

¹⁷ Kil ku na njata, pa i njata son na Siñor.

¹⁸ Kil ku Siñor pensa ben del, el ku ta setadu; i ka kil ku ta ngaba si propi kabesa.