2 Koríntius 1 - BIBLIA - traduson antigu in Krioulo

Kumsada ku manteña

¹ Ami Paulu, apostolu di Kristu Jesus pa vontadi di Deus, ku no ermon Timótiu, no na skirbi pa igreẑa di Deus ku sta na Korintu, ku tudu pobu di Deus ku sta na tudu Akaia.

² N misti pa Deus no Pape ku Siñor Jesus Kristu da bos fabur ku pas.

Paulu fala Deus obrigadu

³ No ngaba Deus, Pape di no Siñor Jesus Kristu, Pape ku ta ten pena di nos, Deus ku tudu koraẑen bin del,

⁴ ku ta animanu na tudu kasabi, pa no pudi tambi anima utrus na tudu koldadi kasabi. No ta da utrus ki koraẑen ku anos propi no risibi di Deus.

⁵ Suma ku sufrimentu di Kristu ciu, anos no toma parti nel, asin tambi ku no ta risibi garandi koraẑen pabia di Kristu.

⁶ Si no sufri, i pa bo sedu animadu, pa bo pudi ten salbason. Si no animadu, abos tambi bo animadu, bo ta dadu forsa pa nguenta ku pasensa mesmu sufrimentu ku anos tambi no nguenta.

⁷ No speransa pa bos i firmi. No sibi kuma, suma ku bo toma parti na kasabi, bo na risibi tambi koraẑen.

⁸ Ermons, N misti pa bo sibi kansera ku bin riba di nos na pruvinsia di Asia. Kargu ku bin riba di nos i pisadu dimas pa no nguental, tok no pirdi speransa di vida.

⁹ No pudi sintiba dentru di nos kuma no sta kondenadu pa mortu, ma e kusa kontisi pa ka no fiansa na no kabesa, ma na Deus ku ta lantanda mortus.

¹⁰ El i libranu di ki garandi pirigu di mortu; i na torna libranu mas. No pui no speransa nel kuma i na libranu sempri,

¹¹ si bo kontinua judanu na bo orason. Asin suma ku manga di bos na ora pa nos, Deus na mostranu si fabur; manga di jinti na gardisil pabia di nos.

Mudansa na planu di Paulu

¹² Kusa ku no pudi njata nel: no konsiensia ta mostranu klaru kuma no vida na mundu, prinsipalmenti na no tratu ku bos, i sedu na puresa ku bardadi ku bin di Deus. I ka na jiresa di karni, ma i fabur di Deus.

^13-14 No na skirbi bos son kil ku bo pudi lei, bo ntindi. Nin ku gosi bo na ntindinu son un bokadu, ma N ten speransa kuma bo na bin ntindinu mas diritu, pa bo ten tantu sabura na nos suma ku no na ten na bos na dia di Siñor Jesus.

¹⁵ N tenba tantu sertesa de kusas ku N fasi kalkulu pa visita bos purmeru, pa bo risibi dus benson,

¹⁶ pabia, suma ku N na baiba pa Masedonia, N mistiba panti N visita bos; ora ku N na riba, pa N torna visita bos, pa bo judan na ña bias pa Judeia.

¹⁷ Es i kalkulu ku N fasiba. Nta N torna rabidal sin pensa? O si N na fasi ña planu, N ta fasil na ña vontadi suma jinti di mundu, pa N fala “Sin sin” ku “Nau Nau” na mesmu tempu?

¹⁸ Suma ku Deus i fiel, kil ku no ta fala bos i ka Sin ku Nau jagasidu.

¹⁹ Fiju di Deus, Jesus Kristu, ku ami ku Timótiu ku Silvanu no konta bos del, i ka jagasi Sin ku Nau, ma el i son Sin.

²⁰ Suma ku tudu purmesa di Deus, i Jesus ku sedu ki SIN ku sta riba del. E ku manda, pabia del, no ta fala Amen pa gloria di Deus.

²¹ I Deus ku konfirmanu ku bos na no ligason ku Kristu, i unjinu.

²² I el tambi ku punu si marka, i danu si Spiritu dentru di no korson suma garantia.

²³ N coma Deus pa ña tustumuña; el i kunsi ña korson. Pa popa bos ku manda N ka bai Korintu te gosi.

²⁴ No ka misti forsa bos na bo krensa, pabia bo sta firmi na fe, ma no na tarbaja juntu ku bos pa bo pudi sta mas sabi.