1 Timótiu 5 - BIBLIA - traduson antigu in Krioulo

Aserka di bejus ku viuvas

¹ Ka bu papia duru ku omis beju, ma konsija elis suma bu pape. Trata rapasis suma bu ermons.

² Trata minjeris beju suma bu mame, minjeris nobu suma bu irmas, na un manera puru.

³ Viuvas ku ka tene ningin, bo ta toma konta delis,

⁴ ma si un viuva tene fiju o netu, ki fijus dibi di sibi purmeru fasi se dever riliẑiosu ku se propi familia, pa paga obrigason pa se papes, pabia i el ku Deus ta kontenti ku el.

⁵ Viuva ku na bardadi ka tene ningin, ma i dingi, i ta pui si speransa na Deus, i kontinua di noti ku di dia na orason, i na pidi Deus ajuda,

⁶ ma viuva ku ntrega si kabesa na sabura de mundu, nin ki sta inda di vida, i sta mortu.

⁷ Da elis ordi, pa e pudi yanda sin kulpa.

⁸ Si algin ka ta trata di si parentis, purmeru kilis ku mas pertu el, i nega si fe; i pior di ki algin ku ka sedu krenti.

⁹ Bo pui na lista son viuva ku ciga sesenta anu, ku seduba fiel pa si omi,

¹⁰ ku kunsidu kuma i ta fasi bon obras; ku kria si fijus diritu, ku ta risibi ospris, ku ta laba pe di pobu di Deus, ku ta sakura kilis ku sta forontadu, ku da si vida pa fasi tudu bon obra.

¹¹ Ka bu pui nomi di viuvas mas nobu, pabia ora ku se diseẑu pui pa e misti kasa, e ta da Kristu kosta.

¹² Asin e ta sedu kulpadu di kebra purmesa ke fasiba.

¹³ Fora del, manera ke ta yanda kada kasa, e ta bin sedu amonton. I ka son amonton, ma papiadur; e ta miti boka na tudu kombersa; e ta papia kusa ke ka dibi di papia.

¹⁴ Asin, N ta misti pa viuvas mas nobu kasa, pa e tene fijus, e trata di se kasa, pa ka e da motivu pa inimigu fala mal,

¹⁵ pabia utrus disvia ja, e bai tras di Satanas.

¹⁶ Si kualker krenti, omi o minjer, tene viuvas na si familia, i dibi di sustenta elis, pa lebia kargu na igreẑa, pa igreẑa pudi sustenta viuvas ku ka tene ningin.

Aserka di presbíterus

¹⁷ Garandis di igreẑa ku sedu bon diriẑentis e ta ojadu mersidur di pagadu dus bias, riba di tudu, kilis ku ta tarbaja ciu na nsina ku konta Bon Noba,

¹⁸ pabia Skritura fala: “Ka bu mara boka di turu ku sta na tarbaju di masa arus.” I fala tambi: “Un tarbajadur mersi pagamentu.”

¹⁹ Ka bu seta keŝa kontra un garandi di igreẑa si i ka sedu ku dus o tris tustumuña.

²⁰ Kilis ku na fasi mal, raprindi elis dianti di tudu, pa ki utrus pudi medi.

²¹ Dianti di Deus ku Kristu Jesus ku anjus ku kujidu, N na mandau ku tudu seredadi pa bu obdisi e ordi. Ka bu julga sin ntindi kusa diritu; ka bu mostra fabur pa ningin.

²² Ka bu jumna pui mon dipresa riba di algin pa dedikal. Ka bu toma parti na pekadu di utrus. Guarda bu kabesa puru.

²³ Ka bu ba ta bibi son yagu; bibi un bokadiñu di biñu pabia di bu stomagu, manera ku bu ta sta sempri duenti.

²⁴ Pekadu di utru jinti ta lestu ku ojadu; i ta bai si dianti pa justisa, ma di utrus, i ta ojadu son dipus.

²⁵ Mesmu manera tambi, bon kusas ku jinti ta fasi e ta ojadu klaru. Nin si e ka klaru, e ka pudi sukundi.