1 Timótiu 4 - BIBLIA - traduson antigu in Krioulo

Pursoris falsu

¹ Spiritu fala klaru kuma, na fin de tempu, utru jinti na nega fe; e na fia na spiritus munturus, ku nsinamentu di dimonius,

² spajadu pa jinti ku ta konta mintida pa ngana utrus; se konsiensia kingiti suma kil ku kema.

³ E ta tuji kasamenti; e ta pruibi kume utru kusas, kontudu Deus kumpu ki kusas, pa krentis, ku kunsi bardadi diritu, pudi fala Deus obrigadu, e kume.

⁴ Tudu kusa ku Deus kumpu i bon. Nada ka dibi di negadu, ma i ta risibidu ku gardisimentu,

⁵ pabia palabra di Deus ku orason ta fasil sagradu.

Servu fiel na tarbaju

⁶ Si bu da e nsinamentu pa ermons, bu na sedu bon servu di Kristu Jesus. Abo propi bu na alimenta ku palabra di fe, ku bon nsinamentu ku bu na sigi.

⁷ Libra di storias di mundu suma kilis ku minjeris beju ta konta. Kontinua na bu disiplina di vida spiritual.

⁸ Trenamentu di kurpu i ten sertu purbitu, ma trenamentu spiritual i ten purbitu pa tudu, pabia i ten purmesa pa e vida li, ku vida ku na bin.

⁹ Es i palabra ku bu dibi di fia nel, ku mersi setal ntidu,

¹⁰ kuma pa e fin no tarbaja, no luta, pabia no pui no speransa na Deus bibu, ku sedu Salbadur di tudu jinti, riba di tudu, di kilis ku fia nel.

¹¹ Da elis e ordi ku nsinamentu.

¹² Ka ningin lebsiu suma ku bu nobu inda, ma sedu isemplu pa krentis, na bu palabra, na bu manera, na amor, na fe, na puresa.

¹³ Te ora ku N bai, pega tesu na lei Skritura dianti di jinti, bu konsija, bu nsina.

¹⁴ Ka bu diskuda ku don ku sta na bo, ku Deus dau oca ku anunsiaduris papia, presbíterus pui mon riba di bo.

¹⁵ Pui sintidu ne kusas, bu pega tesu nelis, pa tudu jinti pudi oja kuma ku bu na bai dianti.

¹⁶ Toma sintidu ku bu kabesa, ku kil ku bu na nsina. Kontinua ne kusas, pabia si bu na fasi asin, bu ta salba bu kabesa, ku kilis ku na obiu.