1 Timótiu 3 - BIBLIA - traduson antigu in Krioulo

Diriẑentis na igreẑa

¹ Es i un ditu di bardadi: Si un omi ten vontadi di sedu presbiteru, i dija bon tarbaju.

² I pirsis pa un presbiteru sedu sin kulpa, maridu di un minjer son, seriu, ku sibi guberna si kabesa, ku ten ordi, ku ta risibi ospri na si kasa, ku ten jitu pa nsina.

³ I ka dibi di ba ta bibi biñu ciu, nin i ka dibi di sedu brabu, ma di pasensa, ku ka gosta di jus; i ka dibi di ba ta faima pa diñeru.

⁴ I dibi di sibi guberna si kasa diritu, pa si fijus obdisil ku tudu rispitu,

⁵ pabia si algin ka sibi guberna si familia propi, kuma ki pudi toma konta di igreẑa di Deus?

⁶ I dibi di sedu algin maduru na fe, pa ka i fika incadu ku orgulyu, i bin kai na kondenason suma ku diabu kai.

⁷ Tambi i pirsis pa i sedu un algin ku jinti di fora ta rispita, pa i ka kai na disprezu, o na armadilia di diabu.

Diákunus (ku sedu judaduris)

⁸ Di mesmu manera diákunus dibi di sedu retu; pa ka e ten dus fála, pa ka e bibi biñu ciu, pa ka e faima pa diñeru.

⁹ E dibi di pega bardadi fundu di fe ku konsiensia puru.

¹⁰ E ten ku probadu purmeru; dipus, si i ka ten nada kontra elis, e ta pega tarbaju.

¹¹ Minjeris tambi e dibi di sedu retu, ku ka ta papia mal di utru, seriu, fiel na tudu kusa.

¹² Diákunu dibi di sedu maridu di un minjer son, i dibi di sibi guberna si kasa ku si fijus diritu.

¹³ Diákunus ku ta fasi se tarbaju diritu, e ta ngaña lugar di rispitu, e ta pudi papia ku fiansa aserka di se fe na Kristu Jesus.

Garandi sigridu

¹⁴ N ka misti tarda pa bai jubiu, ma N na skirbi e karta.

¹⁵ Si kontra N tarda pa bai, bu ta sibi kuma ku algin dibi di yanda na familia di Deus, ku sedu igreẑa di Deus bibu, kuluna ku firkija di bardadi.

¹⁶ I ka ten duvida kuma sigridu di no fe i fundu: “Kil ku parsi na kurpu di omi, na si spiritu i mostradu justu; anjus ojal; tudu rasa kontadu aserka del; jinti di tudu mundu fia nel; i risibidu na gloria na seu.”