1 Timótiu 2 - BIBLIA - traduson antigu in Krioulo

Kultu di orason

¹ Purmeru kusa, N na roga bos pa bo pidi Deus, bo ora, bo falal obrigadu, bo rogal pa tudu jinti —

² pa reis, ku tudu otridadi, pa no pudi tene un vida ketu, susegadu, ku tudu rispitu pa Deus, ku bon komportamentu.

³ Es i bon; i ta pui Deus no Salbadur kontenti.

⁴ El i misti pa tudu jinti salba, pa e ciga di kunsi bardadi.

⁵ I ten un Deus son, ku un algin ku sta na metadi di Deus ku jinti, ku sedu Kristu Jesus, omi,

⁶ kil ku da si kabesa pa liberta tudu jinti, pa da proba na tempu propi kuma Deus misti salba tudu jinti.

⁷ E ku manda N fasidu mestre ku apostolu, pa N nsina jintius aserka di fe di bardadi. (N na konta bardadi; N ka na konta mintida.)

⁸ Asin N misti, na tudu lugar, pa omis ora, pa e lantanda mon puru, sin raiba, sin jus.

⁹ N misti tambi pa minjeris bisti simplis, ku rispitu, na manera diritu, pa ka e pintia garandi modas, pa ka e faja ku uru o pérolas, nin ku bistidu karu,

¹⁰ ma ku bon obras, suma minjeris ku fala kuma e na sirbi Deus.

¹¹ Minjer dibi di kala, i fika ketu, i sukuta nsinamentu.

¹² N ka ta disa pa minjer nsina, nin pa i manda riba di omi, ma pa i fika ketu,

¹³ pabia Adon kumpudu purmeru, dipus Eva.

¹⁴ I ka Adon ku nganadu, ma i minjer ku nganadu, i kebra mandamentu di Deus,

¹⁵ ma si i kontinua na fe, amor, vida puru ku seredadi, na ora di padi i na salba.