1 Timótiu 1 - BIBLIA - traduson antigu in Krioulo

Kumsada ku manteña

¹ Ami Paulu, apostolu di Jesus Kristu konformi mandadu di Deus no Salbadur, ku Kristu Jesus no speransa, N na skirbi pa Timótiu, ku sedu na bardadi ña fiju na fe.

² N misti pa Deus no Pape ku Kristu Jesus no Siñor dau fabur, miserikordia ku pas.

Avisu kontra nsinamentu falsu

³ Oca ku N na baiba pa Masedonia, N rogau pa bu fika na Éfesu, pa manda sertu jinti pa e para ku nsinamentus falsu,

⁴ nin pa ka e liga ku storias ku ki listas kumpridu di jinti antigu ku ka ta kaba, pabia i ta tisi son diskutison; i ka ta judanu kunsi planu di Deus ku ta bin di fe.

⁵ N da e ordi pa disperta amor ku ta sai di un korson puru, di un bon konsiensia, di un fe ki ka di finjimentu.

⁶ Utru jinti disvia de kusas, e bai miti na diskutison di tulesa.

⁷ E misti sedu pursoris di lei, ma e ka ntindi nin palabras ke na papia, nin asuntu ke na afirma ku garandi fiansa.

⁸ No sibi kuma lei i bon, si no tratal suma ki dibi di sedu.

⁹ No ten ku lembra kuma lei i ka fasidu pa kilis ku na yanda diritu, ma pa kilis ku ta kebra lei, ku ta nega obdisi ordi, kilis ku ka mporta ku Deus, ku ta peka, ku ka ten riliẑion, mundanus, ku ta mata papes ku mames, mataduris di jinti,

¹⁰ kilis ku ta yanda na vida susu, kilis ku ta torkia atu seksual, furtaduris di jinti, munturusis, ku kilis ku ta lantanda falsu tustumuñu, pa tudu kil ki kontra bon nsinamentu

¹¹ ku sta na Bon Noba di Deus gloriosu ku mersi ngabadu, ki Bon Noba ki dan pa N konta.

Paulu gardisi Deus

¹² N gardisi kil ku dan forsa, ku sedu Kristu Jesus no Siñor. N falal obrigadu pa manera ki ojan fiel, i pun na si tarbaju,

¹³ kontudu na tempu ku pasa N fala mal kontra el, N pirsigil, N nsultal, ma N yangasa miserikordia di Deus, pabia N ka tenba inda fe; N ka sibiba ke ku N na fasi.

¹⁴ No Siñor darma si fabur ciu riba di mi, i dan ki fe ku amor ku sedu di nos na Kristu Jesus.

¹⁵ Es i palabra ku bo pudi fia nel, ku mersi pa setal ntidu, kuma Kristu Jesus bin mundu pa salba kilis ku peka. Ami N sedu pior delis,

¹⁶ ma, pabia di kila, N yangasa miserikordia, pa Kristu Jesus pudi mostra tudu si pasensa pa mi, pior di tudu pekadur, pa N pudi sedu isemplu di kilis ku na bin setal pa risibi vida ku ka ta kaba.

¹⁷ Asin no da onra ku gloria pa tudu sempri pa Rei iternu, uniku Deus, ku ka na muri, ku ka ta ojadu. Amen.

¹⁸ Ña fiju Timótiu, N pui e kargu riba di bo, konformi palabras di rekadu di Deus ku daduba aserka di bo. Usa ki palabras suma arma pa fasi bon gera.

¹⁹ Guarda bu fe, ku bon konsiensia. Utru jinti nega sukuta ke ku se konsiensia na fala elis, e dana se fe.

²⁰ Entri elis i sedu Imeneu ku Alŝandri, kilis ku N ntrega Satanas, pa e pudi nsina ka ba ta papia mal di Deus.