1 Tesalonisensis 5 - BIBLIA - traduson antigu in Krioulo

Bo pruntia pa dia ku Siñor na bin

¹ Ermons, no ka pirsisa di skirbi bos di data ku tempu,

² pabia abos propi bo sibi kuma Dia di Siñor na bin suma ku ladron ta bin di noti.

³ Ora ku jinti fala kuma tudu sta susegadu, suguru, i ta oja garandi danu ciga riba delis di repenti, suma ku dur di partu ta ciga na minjer preñada. Di nin un manera e ka na kapli.

⁴ Abos, ermons, bo ka sta na sukuru pa ki dia paña bos suma ladron.

⁵ Abos tudu bo sedu di lus, bo sedu jinti di dia. No ka sedu jinti di di noti, nin di sukuru.

⁶ Ka no durmi suma utru jinti; no fika kordadu; ka no cami.

⁷ I di noti ku jinti ta durmi; i di noti tambi ke ta cami,

⁸ ma anos, suma ku no sedu di dia, no dibi di sedu seriu; no pui fe ku amor suma armadura di pitu. No ten speransa di salbason suma kapasiti.

⁹ Deus ka kujinu pa si raiba sta riba di nos, ma pa no yangasa salbason pa meiu di no Siñor Jesus Kristu,

¹⁰ ku muri pa nos pa, si i ojanu bibu o mortu ora ki bin, no pudi vivi juntu ku el.

¹¹ Asin bo da ŋutru koraẑen, bo juda ŋutru, suma ku na bardadi bo na fasi ja.

Ordi di kabantada ku manteñas

¹² Ermons, N roga bos pa bo rispita kilis ku na tarbaja na bo metadi, ku ta diriẑi bos na bo union ku Siñor, e ta nsina bos.

¹³ Bo trata elis ku garandi rispitu ku amor pabia di se tarbaju. Bo vivi susegadu entri bos.

¹⁴ Ermons, no roga bos tambi pa bo raprindi risu kilis ku ka ta tarbaja; bo da koraẑen pa kilis ku ta medi; bo juda kilis ku fraku; bo ten pasensa ku tudu jinti.

¹⁵ Bo jubi pa ka ningin torna mal pa mal; bo buska fasi ben sempri, un pa utru, i pa tudu jinti.

¹⁶ Bo sta sempri kontenti.

¹⁷ Bo ora sempri.

¹⁸ Bo fala obrigadu na tudu kusa, pabia asin ku Deus misti pa bo fasi na bo vida na Kristu Jesus.

¹⁹ Ka bo paga fugu di Spiritu di Deus.

²⁰ Ka bo njuti rekadu ku Deus manda pa bos na boka di algin.

²¹ Bo proba tudu; bo guarda kil ki bon.

²² Bo libra di tudu koldadi mal.

²³ Deus propi ku ta danu pas i ta fasi bos puru na tudu manera. I ta guarda tudu parti di bos, spiritu, alma ku kurpu, sin kulpa te ora ku no Siñor Jesus Kristu bin.

²⁴ Kil ku coma bos i di fiansa; i na fasil.

²⁵ Ermons, bo ora tambi pa nos.

²⁶ Bo fala tudu ermons manteña ku beẑu santu.

²⁷ N na fala bos na nomi di Siñor pa e karta leidu pa tudu ermondadi.

²⁸ Fabur di no Siñor Jesus Kristu ta sta ku bos. Amen.