1 Tesalonisensis 1 - BIBLIA - traduson antigu in Krioulo

Kumsada ku manteña

¹ Ami Paulu, ku Silvanu ku Timótiu, no na skirbi pa igreẑa ku sta na Tesalónika, ku sedu di Deus no Pape ku Siñor Jesus Kristu. N misti pa bo ten fabur ku pas.

Vida ku fe di jinti di Tesalónika

² No ta fala sempri Deus obrigadu pa bos tudu; no ta coma bo nomi sempri na no orason.

³ No ta lembra sempri dianti di no Pape, ku sedu Deus, kuma ku bo fe ta mostra na kusas ku bo na fasi; bo amor i pui bo tarbaja ciu, bo speransa na no Siñor Jesus Kristu i firmi.

⁴ Ermons ku Deus ama, no ten sertesa kuma i el ku kuji bos.

⁵ Oca ku no leba bos Bon Noba, i ka son ku palabra, ma tambi ku puder na Spiritu Santu, ku garandi sertesa. Bo sibi kuma ku no na viviba na bo metadi, pa ben di bos.

⁶ Abos bo sigiba no isemplu, ku di Siñor. Kontudu bo sufri ciu, bo risibi palabra ku kontentamentu ku Spiritu Santu da bos.

⁷ Asin bo bin sedu isemplu pa tudu krentis na Masedonia ku Akaia.

⁸ Palabra di Siñor sai di bos, i obidu; i ka son na Masedonia ku Akaia, ma tambi na tudu lugar, noba di bo fe na Deus i ciga na oreja di jinti, tok no ka ten mas nada di fala,

⁹ pabia elis propi e ta spaja noba di no visita pa bos, kuma ku bo larga idulus, bo bin pa sirbi Deus bibu, Deus di bardadi,

¹⁰ tambi pa pera si Fiju ku na bin di seu, ku sedu Jesus, ku Deus lantanda di mortu, ku na libranu di raiba di Deus ku na bin.