1 Samuel 8 - BIBLIA - traduson antigu in Krioulo

Israelitas pidi un rei

¹ Oca ku Samuel staba ja beju, i pui si fijus pa e sedu juisis riba di Israel.

² Nomi di si purmeru fiju i Joel, si sugundu fiju i Abias. E seduba juisis na Berseba,

³ ma elis e ka na yandaba na kamiñu di se pape; e puiba sintidu son pa ngaña diñeru, e ta tomaba suku di bas, e ta tursi justisa.

⁴ Tudu garandis di Israel junta, e bai pa Samuel na Ramá,

⁵ e bai falal: “Abo bu beju ja, bu fijus ka na yanda na bu kamiñu. Asin bu ta ranjanu un rei ku na ba ta julganu, suma ku tudu nasons tene.”

⁶ Samuel ka fika kontenti ku ki palabra manera ke fala pa i da elis un rei ku na ba ta julga elis. Asin Samuel papia ku SIÑOR.

⁷ SIÑOR falal: “Obi tudu kusa ku pobu na falau, pabia i ka abo ke nega, ma i ami ke ka misti pa N rena riba delis.

⁸ E na fasiu suma tudu kusa ke fasi disna di dia ku N tira elis na Ejitu te aos, pabia e disan, e bai na adora utru deusis.

⁹ Obi ke ke falau, ma bu na avisa elis risu, bu konta elis kal ku na sedu kustumu di rei ku na rena riba delis.”

¹⁰ Samuel konta tudu palabras di SIÑOR pa jinti ku pidil un rei,

¹¹ i fala: “Es i na sedu kustumu di rei ku na rena riba di bos: i na toma bo fijus pa e tarbaja ku si karus, pa ba ta monta si kabalus, pa ba ta kuri dianti di si karus;

¹² i na pui elis suma ŝefis di milyaris ku ŝefis di sinkuenta, o pa e labra si lugaris, pa korta si arus, pa ba ta kumpu si feramentus di gera, ku ekipamentu di si karus.

¹³ I na toma bo fijus femia pa e sedu purfumistas, kusñeras o paderus.

¹⁴ I na toma bo minjor lugaris, ku ortas di uva, ku di olivera, i na da elis pa si ŝefis.

¹⁵ I na toma desimu parti di bo simentera ku bo uvas pa da si ŝefis ku si kriadus.

¹⁶ I na toma tambi bo kriadus macu ku femia, bo minjor rapasis ku bo burus, pa pui na si tarbaju.

¹⁷ I na toma desimu parti di bo limarias; abos propi bo na sedu si katibus.

¹⁸ Na ki tempu bo na keŝa pabia di rei ku bo kuji, ma SIÑOR ka na obi bos na ki dia.”

¹⁹ Ma pobu ka seta obi palabra di Samuel; e fala: “Nau, ma no na tene un rei riba di nos.

²⁰ No na sedu tambi suma tudu utru nason; no rei na julganu, i na ba ta sai no dianti pa geria pa nos.”

²¹ Samuel obi tudu ki palabra di pobu, i ripitil dianti di SIÑOR.

²² SIÑOR falal: “Obi ke ke falau, bu ranja elis un rei.” Asin Samuel fala fijus di Israel: “Kada kin pudi riba pa si prasa.”