1 Samuel 7 - BIBLIA - traduson antigu in Krioulo

¹ Asin omis di Kiriat-Jearin bin e leba arka di SIÑOR pa kasa di Abinadab, na monti; e konsagra si fiju Eleazar pa i toma konta di arka di SIÑOR.

Samuel coma jinti pa e ripindi

² Arka tarda na Kiriat-Jearin tok i pasa vinti anu. Tudu pobu di Israel fika tristi, e na buska SIÑOR.

³ Samuel fala tudu pobu di Israel: “Si bo na konverti pa SIÑOR ku tudu bo korson, bo tira astarotis ku utru deusis strañu na bo metadi, bo purpara bo korson pa SIÑOR, bo adoral, el son. Asin i na libra bos na mon di filisteus.”

⁴ Fijus di Israel tira baalins ku astarotis na se metadi, e adora SIÑOR son.

⁵ Samuel manda coma tudu Israel pa e junta na Mizpá, pa i pudi ora SIÑOR pa elis.

⁶ Oca ke junta la, e kata yagu, e darmal dianti di SIÑOR, e junjuŋa ki dia, e fala: “No peka kontra SIÑOR.” (I na Mizpá ku Samuel ta fasiba justisa pa fijus di Israel.)

Israel ngaña filisteus

⁷ Oca ku filisteus obi kuma fijus di Israel juntaba na Mizpá, ŝefis di filisteus sai pa bai geria kontra Israel. Oca ku fijus di Israel obi ki kusa, e fika ku medu di filisteus.

⁸ E fala Samuel: “Ka bu para coma SIÑOR no Deus pa nos, pa i pudi libranu na mon di filisteus.”

⁹ Asin Samuel toma un karnelsiñu ku na mama inda, i sakrifikal ntidu pa SIÑOR suma oferta kemadu. Samuel coma SIÑOR pa Israel; SIÑOR kudil.

¹⁰ Oca ku Samuel na sakrifikaba inda ki oferta kemadu, filisteus ciga pa geria kontra Israel. Na ki ora SIÑOR turmenta ku garandi turbada riba di filisteus, i miti elis na kunfuson tok e panta, e kuri dianti di israelitas.

¹¹ Omis di Israel sai na Mizpá, e pega tras di filisteus, e mata-mata elis te pertu di Bei-Kar.

¹² Samuel toma un pedra, i firmantal na metadi di Mizpá ku Sen, i coma si nomi Ebenezer, i fala: “SIÑOR judanu te li.”

¹³ Asin filisteus pudu bas; nunka mas e ka bin na tera di Israel, pabia mon di SIÑOR staba kontra filisteus duranti tudu vida di Samuel.

¹⁴ Prasas ku filisteus tomaba e ribantadu pa Israel. Desdi Ekron te Gat, Israel liberta si frontera na mon di filisteus. I tenba pas na metadi di Israel ku amoreus.

¹⁵ Samuel kontinua sedu ŝef na Israel tudu si vida.

¹⁶ I ta daba volta kada anu pa visita Betel, Jilgal ku Mizpá, i ta julgaba Israel na tudu ki prasas,

¹⁷ ma i ta riba pa Ramá pabia la ku si kasa staba; i ta julgaba Israel di la. I kumpu un altar la pa SIÑOR.