1 Samuel 31 - BIBLIA - traduson antigu in Krioulo

Mortu di Saul

¹ Filisteus geria kontra Israel; omis di Israel kuri dianti di filisteus; manga delis muri na montaña di Jilboa.

² Filisteus pega tesu tras di Saul ku si fijus, e mata Jonatas, Abinadab ku Malkisua, fijus di Saul.

³ Gera torna forti kontra Saul; soldadus yangasal ku fleŝa, e molostal risu.

⁴ Saul fala si rapas ku ta lebal feramentus di gera: “Tira bu spada, bu furan ku el, pa e jinti insirkunsidadu ka bin furan, e fasi trosa di mi.” Si rapas ka misti, pabia i tenba garandi medu. Asin Saul toma si spada, i kai riba del.

⁵ Oca rapas oja kuma Saul muri, el tambi i kai riba di si spada, i muri juntu ku el.

⁶ Asin Saul ku si tris fiju ku si rapas ku ta lebal feramentus di gera, ku tudu si omis, e muri tudu na ki dia.

⁷ Oca israelitas ku staba na reẑion di kobon ku di riu Jordon oja kuma tropas di Israel na kuri, e obi kuma Saul ku si fijus muri, e bandona prasas, e kuri; filisteus bin mora la na ki prasas.

⁸ Na utru dia, oca filisteus bin pa bin tira kusas na difuntus, e oja Saul ku si tris fiju ditadu mortu na montaña di Jilboa.

⁹ E korta kabesa di Saul, e tiral armaduras, e manda algin pa tudu ladu di se tera pa konta nobas na baloba di se idulus ku na metadi di pobu.

¹⁰ E pui feramentus di gera di Saul na baloba di Astarot, e prega si kurpu na mura di Bet-San.

¹¹ Oca jinti di Jabes-Jilead obi ke ku filisteus fasi Saul,

¹² tudu omis di koraẑen lanta, e yanda tudu noti, e bai tira kurpu di Saul ku kurpus di si fijus na mura di Bet-San, e bai pa Jabes, e bai kema elis,

¹³ e toma se os, e ntera elis bas di un arvuri na Jabes, e junjuŋa seti dia.