1 Samuel 30 - BIBLIA - traduson antigu in Krioulo

Amalekitas ataka Ziklag

¹ Na terseru dia Davi ku si omis ciga na Ziklag. Amalekitas yentraba ja na sul, e ataka Ziklag, e pui fugu la.

² Minjeris ku staba la, e leba elis katibu, ma e ka mata ningin, nin mininu nin garandi; e leba elis son, e bai se kamiñu.

³ Oca Davi ku si omis ciga, e oja prasa kemadu ku fugu; se minjeris ku se fijus macu ku femia lebadu katibu.

⁴ Davi ku omis ku staba ku el e yalsa fála, e cora, tok e ka tenba mas forsa di cora.

⁵ Tambi ki dus minjer di Davi lebadu, ku sedu Ainoan di Jizreel ku Abigail, viuva di Nabal, di Karmelu.

⁶ Davi foronta dimas, pabia jinti na papia di dal ku pedras, manera ku elis tudu e fika ku kasabi di se fijus macu ku femia; ma Davi oja forsa na SIÑOR si Deus.

Davi serka amalekitas, i liberta katibus

⁷ Davi fala ki saserdoti Abiatar, fiju di Aimelek: “Di fabur, tisin efodi pa li.” Abiatar lebal efodi.

⁸ Davi konsulta SIÑOR, i puntal: “N na serka ki tropas? N na paña elis?” SIÑOR falal: “Serka elis pabia bu na paña elis, bu na liberta tudu ki katibus.”

⁹ Davi ku ki seizentus omi ku staba ku el e bai tok e ciga na riu di Besor, nunde ku utrus fika,

¹⁰ pabia duzentus omi kansa dimas pa kamba riu; asin e fika la. Davi ku kuatrusentus omi e kontinua tras di amalekitas.

¹¹ La na matu e oja un omi di Ejitu, e lebal pa Davi. E dal kumida, tudu ku yagu di bibi.

¹² E dal tambi un padas di mundu di figu seku, ku dus kacu di uva seku. I kume; si forsa riba nel, pabia i tenba tris dia ku tris noti ki ka kume nada, nin i ka bibi yagu.

¹³ Davi puntal: “Abo i katibu di kin? Nunde ku bu sai?” Omi falal: “Ami i ejipsiu, katibu di un omi amalekita. Ña mestre bandonan ja tris dia, pabia N duensi.

¹⁴ No ataka na ladu di sul di kereteus, ku na ladu di Judá, ku ladu di sul di Kaleb, no pui fugu na Ziklag.”

¹⁵ Davi puntal: “Bu pudi lebanu pa ki tropas?” I falal: “Si bu jurmentan dianti di Deus kuma bu ka na matan, nin bu ka na ntregan na mon di ña mestre, N ta lebau pa ki tropas.”

¹⁶ Asin i leba Davi, tok e oja ki tropas; e staba la pajigadu na tudu ki matu, e na kume, e na bibi, e na baja, pabia di ki manga di kusas ke toma na tera di filisteus ku tera di Judá.

¹⁷ Davi ataka elis, disna di fuska-fuska te di tardi di utru dia. Nin un son delis ka kapli, si i ka kuatrusentus rapas ku monta riba di kamelus, e kuri.

¹⁸ Asin Davi libra tudu jinti ku amalekitas lebaba, tudu ku si dus minjer;

¹⁹ ningin ka falta, nin mininu nin garandi, nin rapas nin bajuda. Tambi Davi torna toma tudu ki kusas ku lebaduba, i riba ku elis tudu.

²⁰ I toma tambi tudu karnel ku baka; e pui tudu limarias dianti, e fala: “Es i kil ku Davi toma na gera.”

²¹ Oca Davi ciga nunde ki duzentus omi ku fikaba na riu di Besor, manera ke kansaba dimas pa bai mas dianti, e sai pa bin kontra ku Davi ku jinti ku na binba ku el. Davi ciga i fala elis manteña.

²² Ma tudu malandrus ku malvadus na metadi di kilis ku baiba ku Davi e fala: “Suma ke ka bai ku nos, no ka na da elis nada di kusas ku no toma, ma kada kin na toma si minjer ku si fijus, i bai.”

²³ Davi fala: “Ña ermons, bo ka pudi fasi asin ku kil ku SIÑOR danu. I guardanu, i ntrega ki tropas ku bin kontra nos na no mon.

²⁴ Kin ku na seta e palabra ku bo fala? Parti di kilis ku bai gera i na sedu suma di kilis ku fika ku kargu; kusas na rapatidu na mesmu pa kada kin.”

²⁵ Asin Davi pui ki lei na Israel ku ta sigidu disna di ki tempu te aos.

²⁶ Oca Davi ciga na Ziklag, i manda utru kusas ki toma na gera pa garandis di Judá, si amigus, i fala: “Ali un pursenti pa bos di kusas ku no toma na mon di inimigus di SIÑOR.”

²⁷ I manda pa kilis di Betel, Ramot di sul, Jatir,

²⁸ Aroer, Sifmot, Estemoa,

²⁹ Rakal, ku kilis ku staba na prasas di jerameelitas ku di keneus,

³⁰ ku kilis di Orma, Korasan, Atak

³¹ ku Ebron, ku tudu kaus ku Davi yandaba ku si omis.