1 Samuel 3 - BIBLIA - traduson antigu in Krioulo

Deus papia ku Samuel

¹ Rapas Samuel na sirbiba dianti di SIÑOR, na mon di Eli. Na ki tempu i raru ba pa palabra di SIÑOR obidu; i ka tenba manga di vison.

² Un dia, di noti, Eli ditaba na si kuartu. Si uju kumsaba ja sukuru; i ka pudi oja diritu.

³ Samuel ditaba tambi, antis di kanderu di Deus paga na kasa di SIÑOR, nunde ku arka di Deus ta staba.

⁴ SIÑOR coma Samuel. Kila ruspundi: “Alin li.”

⁵ I kuri pa Eli, i falal: “Alin li; bu coman.” Ma Eli falal: “N ka comau; riba, bu bai dita.” I bai i bai dita.

⁶ SIÑOR torna coma Samuel utru bias. Samuel lanta i bai pa Eli, i falal: “Alin li; bu coman.” Eli falal: “N ka comau, ña fiju; riba, bu bai dita.”

⁷ Samuel ka kunsiba inda SIÑOR, pabia nunka SIÑOR ka papiaba ku el.

⁸ SIÑOR torna comal terseru bias; i lanta i bai pa Eli, i falal: “Alin li, pabia bu coman.” Eli ntindi ja kuma i SIÑOR ku na comaba rapas.

⁹ Asin Eli fala Samuel: “Riba, bu bai dita. Si i torna comau mas, bu ta fala: ‘Papia, SIÑOR, pabia bu servu na obi.’ ” Asin Samuel bai dita na si kau.

¹⁰ SIÑOR bin, i firma la, i comal suma ki fasiba ja, i fala: “Samuel, Samuel.” Samuel falal: “Papia, pabia bu servu na obi.”

¹¹ SIÑOR fala Samuel: “Ali N na bin fasi un kusa na Israel; tudu kin ku obil, i na dimira tok si oreja na pupa, tudu dus.

¹² Si ki dia ciga, N na kumpri kontra Eli tudu kusa ku N fala kontra si familia, disna di kumsada te na kabantada.

¹³ N kontal ja kuma N na julga si familia pa sempri pabia di pekadu ki sibiba del. Si fijus na fasi puku di Deus; i ka tuji elis.

¹⁴ E ku manda N jurmenta pa familia di Eli kuma, nunka mas pekadu di familia di Eli ka na tiradu ku sakrifisiu nin ku oferta di kumida.”

Samuel konta Eli si vison

¹⁵ Samuel dita te parmaña, i yabri portas di kasa di SIÑOR, ma i mediba konta Eli ki vison.

¹⁶ Eli comal, i falal: “Ña fiju Samuel.” I falal: “Alin li.”

¹⁷ Eli puntal: “Ke ki kontau? Di fabur, ka bu sukundin el. Deus na kastigau risu si bu sukundin kualker kusa di kil ki falau.”

¹⁸ Asin Samuel kontal tudu ki palabra, i ka sukundil nada. Eli fala: “El i SIÑOR; pa i fasi kusa ki oja kuma i bon.”

¹⁹ Samuel na kirsiba; SIÑOR staba ku el, i ka disa nin un di si palabras kai na con.

²⁰ Tudu jinti na Israel, desdi Dan te Berseba, sibiba kuma Samuel konfirmaduba pa i sedu anunsiadur di SIÑOR.

²¹ SIÑOR kontinua na parsi na Siló, pabia SIÑOR ta manifesta pa Samuel na Siló ku si palabra.