1 Samuel 29 - BIBLIA - traduson antigu in Krioulo

Akis ribanta Davi pa Ziklag

¹ Filisteus junta tudu se tropas na Afeka; israelitas kampa lungu di fonti ku sta na Jizreel.

² Ŝefis di filisteus na avansa ku se grupus di sentenas ku di milyaris. Davi ku si omis e na marŝa na grupu di tras, ku Akis.

³ Kumandantis di filisteus punta: “Ke ku ki ebreus na fasi li?” Akis ruspundi i fala elis: “Es i Davi, ŝef di Saul, rei di Israel. I sta ku mi un anu i tal. Disna di dia ki sai na mon di Saul te aos, N ka oja nin kulpa nel.”

⁴ Kumandantis di filisteus paña raiba kontra Akis, e falal: “Ribanta ki omi pa kau ku bu dal pa i mora. I ka na bai juntu ku nos pa gera, pa ka i bin torna no inimigu na metadi di gera. Kal minjor manera ki pudi ranja pa oja fabur di si mestre di ki lebal kabesas di no omis?

⁵ Nta es i ka ki Davi ke na kantaba del na se bajus, oca ke na fala: ‘Saul mata si milyaris, ma Davi si des milyaris’?”

⁶ Asin Akis coma Davi i falal: “Pa vida di SIÑOR N sibi kuma abo i bon algin. N kontenti ku manera ku bu yanda ku mi na sirvis di tropa, pabia N ka oja nin mal na bo disna di dia ku bu bin pa mi te aos, ma kumandantis ka kontenti ku bo.

⁷ Son pa bu riba pa kasa ku pas; ka bu fasi nada ke pudi oja di mal.”

⁸ Davi punta Akis: “Ma ke ku N fasi? Ke ku bu oja na mi disna di dia ku N yentra na bu sirvis te aos ku manda N ka pudi bai ku bo, ku sedu ña rei ku ña mestre, pa geria kontra bu inimigus?”

⁹ Akis ruspundi i fala Davi: “Na bardadi bu sedu bon pa mi suma anju di Deus, ma kumandantis di filisteus fala kuma bu ka pudi bai ku nos pa gera.

¹⁰ Asin amaña mandrugada, abo, ku jinti ku sai na mon di Saul pa bin ku bo, bo ta lanta sedu, bo bai logu ku sol mansi.”

¹¹ Asin Davi ku si omis lanta mandrugada, e riba pa tera di filisteus. Filisteus kontinua pa Jizreel.