1 Samuel 27 - BIBLIA - traduson antigu in Krioulo

Davi na metadi di filisteus

¹ Davi fala na si sintidu: “Kualker dia Saul na bin matan. Minjor kusa ku N pudi fasi i pa N kapli kinti-kinti pa tera di filisteus, pa Saul pirdi speransa, i para buskan na tudu ladu di Israel; asin N ta kapli na si mon.”

² Asin Davi, ku ki seizentus omi ku staba ku el, e lanta e bai pa Akis, rei di Gat, fiju di Maok.

³ Davi fika ku Akis na Gat, el ku si omis, kada kin ku si familia. Davi leba tambi si dus minjer, Ainoan di Jizreel ku Abigail, viuva di Nabal, di Karmelu.

⁴ Oca Saul kontadu kuma Davi kuri pa Gat, i ka kansa mas ku buskal.

⁵ Davi fala Akis: “Si N oja fabur bu dianti, bu ta dan lugar na un di prasas di bu tera, pa N pudi mora la. Kuma ku bu servu pudi mora ku bo na prasa di rei?”

⁶ Na ki dia Akis dal prasa di Ziklag. Asin Ziklag pertensi reis di Judá te aos.

⁷ Davi mora na tera di filisteus un anu ku kuatru mis.

⁸ Davi ku si omis ta baiba ataka jinti di Jesur ku jirzitas ku amalekitas, pabia na tempu antigu es i jinti ku moraba na tera na kamiñu ku ta bai pa Sur te na tera di Ejitu.

⁹ Si Davi ataka un kau, i ka ta disa nin un omi nin minjer ku vida; i ta tomaba karnel, bakas, burus, kamelus ku ropa; i ta ribaba pa Akis.

¹⁰ Si Akis puntal: “Nunde ku bo ataka aos?” Davi ta falal: “No bai kontra sul di Judá,” o “Kontra sul di jerameelitas,” o “Kontra sul di con di keneus.”

¹¹ Davi ka ta disaba nin omi nin minjer ku vida, nin i ka leba ningin pa Gat ku pudi konta kuma asin ku ’sin ku Davi fasi. Es i si kustumu tudu ki tempu ki mora na tera di filisteus.

¹² Akis fiansaba na Davi, i fala na si sintidu: “Sertamenti i torna nujenti pa si pobu na Israel; asin i na sedu ña servu pa sempri.”