1 Samuel 24 - BIBLIA - traduson antigu in Krioulo

Davi popa vida di Saul

¹ Oca Saul riba di serka filisteus, i kontadu kuma Davi sta na lala di En-Jedi.

² I toma tris mil omi kujidu na tudu Israel, i bai buska Davi ku si omis, tok i ciga riba di rocas di kabra-matu.

³ Na kamiñu i ciga na un kaverna pertu di koral di karnel. Saul yentra la pa bai fasi nesesidadi. Davi ku si omis staba dentru di ki kaverna.

⁴ Omis di Davi falal: “Lembra kusa ku SIÑOR falau, kuma i na ntregau bu inimigu na bu mon; bu ta fasil konformi bu misti. Ali ki dia ciga!” Davi lanta, i bai ketu, i korta ponta di kapa di Saul.

⁵ Dipus, Davi sinti mal na si korson manera ki korta ponta di kapa di Saul.

⁶ I fala si omis: “SIÑOR ta libran di N fasi mal pa ña mestre ku SIÑOR unji, o pa N lantanda ña mon kontra el, pabia SIÑOR kujil pa i sedu rei.”

⁷ Asin Davi tuji si omis ku ki palabra, i ka disa elis pa e lanta kontra Saul. Saul lanta i sai na kaverna, i bai si kamiñu.

⁸ Dipus Davi tambi lanta, i sai na kaverna, i grita tras di Saul, i comal: “Ñu Rei!” Saul jubi pa tras. Davi mpina i mborka ku rostu na con,

⁹ i punta Saul: “Pabia di ke ku bu ta seta kusas ku omis ta kontau, kuma Davi misti fasiu mal?

¹⁰ Aos propi bu oja ku bu uju kuma SIÑOR ntregau na ña mon ne kaverna. Utrus falan pa N matau, ma N popa bu vida. N fala kuma N ka na distindi ña mon kontra ña mestre, pabia i el ku SIÑOR unji.

¹¹ Ña pape, jubi, bu oja e padas di bu kapa na ña mon. N kortau ponta di bu kapa, ma N ka matau. Bu pudi ntindi, bu oja kuma N ka na fasiu mal, nin N ka na rebela kontra bo. N ka fasi mal kontra bo, ma bu na montia ña vida pa tiran el.

¹² SIÑOR ta julga na metadi di mi ku bo, i ta tornau mal ku bu na fasin, ma ña mon ka na fasiu mal.

¹³ Suma ku ditu antigu fala: ‘Son jinti mau ku ta pratika mau kusa.’ Asin ña mon ka na sta kontra bo.

¹⁴ “Kin ku rei di Israel sai si tras? Kin ki na serka? Un kacur mortu? Un pulga?

¹⁵ SIÑOR na sedu juis, i na julga na metadi di mi ku bo, i na jubi ña kasu, i na pursenta ña roson, i na libran na bu mon.”

¹⁶ Oca Davi kaba papia tudu ki palabra, Saul falal: “Ña fiju Davi! Es i bu fála?” Dipus i yalsa si fála, i cora,

¹⁷ i fala Davi: “Abo i mas justu di ki mi. Bu tratan diritu, ma ami N tratau mal.

¹⁸ Aos bu mostra kuma abo i bon pa mi, pabia SIÑOR ntregan na bu mon, ma bu ka matan.

¹⁹ Kin ku ta oja si inimigu, i disal bai si kamiñu sin fasil mal? SIÑOR ta pagau diritu pa kil ku bu fasin aos.

²⁰ N sibi sertu kuma bu na sedu rei; renu di Israel na fika firmi na bu mon.

²¹ Jurmentan na nomi di SIÑOR kuma bu ka na kaba ku ña jorson nin bu ka na tira ña nomi na familia di ña pape.”

²² Asin Davi jurmenta pa Saul. Saul riba pa si kasa, ma Davi ku si omis bai pa se lugar forti.