1 Samuel 23 - BIBLIA - traduson antigu in Krioulo

Davi libra Keila

¹ Davi kontadu kuma filisteus bai geria kontra prasa di Keila, e roba trigu na kau di masa.

² I konsulta SIÑOR i puntal: “Pa N bai geria kontra ki filisteus?” SIÑOR fala Davi: “Bai geria kontra elis, pa bu salba Keila.”

³ Omis di Davi falal: “Jubi, no ten medu li na Judá, ku fadi si no bai Keila pa geria kontra tropas di filisteus!”

⁴ Davi torna konsulta SIÑOR. SIÑOR ruspundi i falal: “Lanta bu bai pa Keila, pabia N ntrega filisteus na bu mon.”

⁵ Asin Davi bai ku si omis pa Keila, i geria kontra filisteus, i mata manga delis, i toma se limarias, i libra jinti di Keila.

⁶ (Oca Abiatar, fiju di Aimelek, kuri pa Davi na Keila, i leba efodi na si mon.)

⁷ Oca Saul kontadu kuma Davi baiba pa Keila, i fala: “Deus ntregan el na ña mon, pabia i sta prezu, manera ki yentra na un prasa ku mura, ku porton ku ta ficadu ku feru.”

⁸ Saul manda coma tudu si tropas pa gera, pa e bai pa Keila, pa bai taja Davi ku si omis.

⁹ Oca Davi sibi kuma Saul na purpara pa bin kontra el, i fala saserdoti Abiatar: “Tisi efodi pa li.”

¹⁰ Dipus i fala: “O SIÑOR, Deus di Israel, N obi kuma Saul na purpara pa bin pa Keila pa bin kaba ku prasa pabia di mi.

¹¹ Jinti di Keila na ntregan na si mon? Saul na bin suma ku N obi? O SIÑOR Deus di Israel, kontan pa N pudi sibi.” SIÑOR falal: “I na bin.”

¹² Davi punta mas: “Jinti di Keila na ntregan na mon di Saul, tudu ku ña omis?” SIÑOR falal: “E na ntregau.”

¹³ Asin Davi lanta ku si omis, serka di seizentus, e sai di Keila, e fika e na yanda di un lugar pa utru. Oca Saul kontadu kuma Davi kapli di Keila, i maina bai la.

Saul serka Davi na lala di Zif

¹⁴ Davi fika i na sukundi-sukundi na monti, na lala di Zif. Saul na buskalba tudu dia, ma Deus ka ntregal na si mon.

¹⁵ Davi sibi kuma Saul sai buskal pa mata. Oca ki staba na un matu na lala di Zif,

¹⁶ Jonatas, fiju di Saul, lanta i bai pa Davi na ki matu, i judal arnoba si forsa na Deus;

¹⁷ i falal: “Ka bu ten medu, pabia mon di ña pape Saul ka na yangasau, ma el i sibi diritu kuma bu na rena riba di Israel; ami N na sedu bu sugundu.”

¹⁸ Elis dus e fasi kontratu dianti di SIÑOR. Davi fika na matu; Jonatas riba pa kasa.

¹⁹ Jinti di Zif bai pa Saul na Jibeá, e falal: “Ala Davi na sukundi na no tera, na lugaris forti na matu na monti di Akilá ku sta na ladu di sul di Jesimon.

²⁰ Ñu Rei pudi bin dia ki misti; no na sedu nkargadu pa ntregal na bu mon.”

²¹ Saul fala elis: “SIÑOR ta bensua bos, pabia bo ten pena di mi.

²² Bo bai, bo bai punta diritu, bo nota kau ki ta bai sempri, ku kin ku ojal la, pabia e kontan kuma el i jiru dimas.

²³ Bo ta bai diskubri tudu kau ki ta sukundi nel, bo ta riba pa mi ku tudu sertesa. Asin N ta bai ku bos. Si i sta na ki ladu, N na pañal, nin si N ten ku buska-buskal na tudu familias di Judá.”

²⁴ Asin e lanta, e bai dianti di Saul pa Zif, ma Davi ku si omis e staba na lala di Maon, na Arabá, na ladu di sul di Jesimon.

²⁵ Saul ku si omis e sai pa bai buskal. Oca Davi kontadu, i bai pa ki monti formadu di rocas, i fika na lala di Maon. Saul obi kila, i pega tras di Davi pa lala di Maon,

²⁶ i na baiba na un ladu di monti; Davi ku si omis la na utru ladu e na fasi forsa pa kapli di Saul, ma Saul ku si omis e taja Davi ku si omis pa paña elis.

²⁷ Na ki ora un omi ciga ku rekadu pa Saul, i falal: “Bin kinti-kinti, pabia filisteus yentra na tera ku forsa.”

²⁸ Asin Saul para serka Davi, i riba pa bai kontra ku filisteus. Pabia des, e coma ki kau Sela-Amalekot.

²⁹ Davi sai la, i bai fika na lugaris forti di En-Jedi.