1 Samuel 21 - BIBLIA - traduson antigu in Krioulo

Davi bai pa saserdoti Aimelek

¹ Davi bai pa Nob, pa saserdoti Aimelek. Aimelek tirmi, i sai pa bai kontra ku Davi, i puntal: “Pabia di ke ku bu bin abo son, sin ningin ku bo?”

² Davi fala saserdoti Aimelek: “Rei nkargan un sirvis, i falan pa ka ningin sibi de kusa ki na mandan fasi, nin di ordis ki dan. N fala ña omis pa e bai kontra ku mi na un kau ku N sinala elis.

³ Ke ku bu tene di kume li? Bu pudi patin sinku pon o kualker kusa ku bu tene.”

⁴ Saserdoti ruspundi i fala Davi: “N ka tene utru pon si i ka pon sagradu; bu pudi tomal si bu omis ka staba ku minjeris ne dias.”

⁵ Davi ruspundi i fala saserdoti: “Sin, na bardadi no tujidu minjeris ne dias, suma sempri ora ku N na sai; kurpus di omis ta fika puru nin ku no na sai pa kualker sirvis, ku fadi ne sirvis di aos.”

⁶ Asin, suma i ka ten utru pon la, saserdoti dal ki pon sagradu ku tiraduba na mesa di SIÑOR pa pudi pui utru pon kinti dianti di SIÑOR.

⁷ I staba la na ki dia un di tarbajaduris di Saul, un edomeu comadu Doeg, ŝef di bakiaduris di Saul, ku na pera pa kompleta si dever riliẑiosu dianti di SIÑOR.

⁸ Davi punta Aimelek: “Bu ka tene li kañaku o spada? Rei lanta ku e ordi kinti-kinti, tok N ka ten tempu di toma ña spada nin utru feramentu di gera.”

⁹ Saserdoti falal: “Spada di ki filisteu Golias ku bu mata na Kobon di Karvaju i sta li tras di efodi, mbuljadu na un panu. Si bu misti, bu ta tomal, pabia i ka ten utru spada li fora di kila.” Davi falal: “I ka ten utru suma kila; dan el.”

Davi kuri pa Akis, rei di Gat

¹⁰ Ki dia Davi kuri pa kapli di Saul, i bai pa Akis, rei di Gat.

¹¹ Ŝefis di Akis puntal: “Nta es i ka Davi, rei di si tera? I ka el ku minjeris kanta aserka del na se bajus, oca ke na fala kuma: ‘Saul mata si milyaris, ma Davi si des milyaris’?”

¹² Davi toma ki palabra seriu, i fika ku garandi medu di Akis, rei di Gat.

¹³ Asin i finji dudu se dianti; ora ke misti pegal, i ta fika i na fasi suma dudu, i na riska na porton di prasa, i na disa kuspiñu kuri na barba.

¹⁴ Akis punta si ŝefis: “Bo ka oja kuma ki omi i dudu? Pabia di ke ku bo tisin el?

¹⁵ Nta N ten falta di dudus, ku manda bo tisin es pa i fasi dudesa ña dianti? N ten ku tenel na ña kasa me?”