1 Samuel 20 - BIBLIA - traduson antigu in Krioulo

Jonatas juda Davi

¹ Davi kuri di Naiot na Ramá, i bai pa Jonatas, i puntal: “Ke ku N fasi? Kal ki ña krimi? Kal kusa mau ku N fasi bu pape ku manda i misti tiran vida?”

² Jonatas ruspundil: “Deus ta libra! Bu ka na muri. Jubi, ña pape ka ta fasi nin kusa garandi nin pikininu sin i ka kontan purmeru. Pabia di ke ku ña pape na sukundin e kusa? N ka fia!”

³ Davi jurmenta i falal: “Bu pape sibi diritu kuma bu gosta ciu di mi. E ku manda i fala na si sintidu kuma Jonatas ka dibi di sibi e kusa, pa ka i fika tristi, ma na bardadi, N jurmentau pa vida di SIÑOR, ku bu vida tambi, kuma i faltan son un pasu pa mortu.”

⁴ Jonatas fala Davi: “N na fasiu kualker kusa ku bu misti.”

⁵ Davi fala Jonatas: “Jubi, amaña i festival di lua nobu. N dibi di kume ku bu pape, ma disan pa N bai sukundi na lugar te di tardi di ermon di amaña.

⁶ Si bu pape nota pa ña falta, bu ta falal kuma N pidiu lisensa pa N janti pa Belen, ña prasa, pabia i na fasidu la ki sakrifisiu di kada anu pa tudu ña familia.

⁷ Si i fala kuma i sta bon, bu servu na fika diskansadu, ma si i paña raiba, bu na sibi kuma i pui tudu si sintidu pa fasin mal.

⁸ N pidiu pa bu mostra bondadi pa bu servu, pabia bu leban pa N fasi kontratu ku bo dianti di SIÑOR. Si N sedu kulpadu, bu ta matan, abo propi; ka bu ntregan na mon di bu pape.”

⁹ Jonatas falal: “E kusa ka na kontisi ku bo! Nta si N teneba ideia kuma ña pape pui sintidu pa fasiu mal, N ka na kontau?”

¹⁰ Davi punta Jonatas: “Kin ku na kontan si bu pape ruspundiu ku raiba?”

¹¹ Jonatas falal: “Bin no bai pa lugar.” Asin e bai juntu.

¹² Jonatas fala Davi: “N jurmentau na nomi di SIÑOR Deus di Israel kuma N na punta ña pape ne ora amaña o ermon di amaña. Si i na mostra un bon spiritu pa bo, N na manda kontau pa bu pudi sibi.

¹³ Tambi si ña pape pui sintidu pa fasiu mal, SIÑOR ta kastigan ciu si N ka kontau, pa N disau kapli pa bu bai ku pas. SIÑOR ta sta ku bo suma ki staba ku ña pape.

¹⁴ Si N kontinua ku vida, bu na mostran bondadi di SIÑOR pa N ka matadu.

¹⁵ Tambi bu ka na para mostra bu bondadi pa ña familia pa sempri, mesmu na tempu ku SIÑOR na kaba ku kada un di inimigus di Davi.

¹⁶ SIÑOR na kastigau si abo ku bu familia bu ka guarda no kontratu.”

¹⁷ Asin Jonatas pui Davi konfirma ki juramentu, pabia di si amor, pabia i amalba ku tudu si korson.

¹⁸ Dipus Jonatas falal: “Amaña i festival di lua nobu. E na sinti bu falta, pabia bu lugar na sta vaziu.

¹⁹ Ermon di amaña bu ta bai di tardi pa ki kau nunde ku bu sukundiba nel na ki dia ku e purblema kumsa; bu ta pera lungu di pedra di Ezel.

²⁰ N na ferca tris fleŝa na ki ladu, suma ora ku N na ferca pa un alvu.

²¹ N na manda rapas, N na falal: ‘Bai, bu bai buska fleŝas.’ Si N falal: ‘Jubi, fleŝas sta ne ladu di bo; tisi elis,’ bu pudi bin, pabia N jurmenta na nomi di SIÑOR bibu kuma bu pudi diskansa; pirigu ka ten,

²² ma si N fala rapas: ‘Jubi, fleŝas sta la bu dianti,’ bu ta bai, pabia i SIÑOR ku disau pa bu bai.

²³ SIÑOR na sta na no metadi pa sempri pa no kumpri ki palabras ku no da ŋutru.”

²⁴ Asin Davi sukundi na lugar. Oca festival di lua nobu ciga, rei sinta pa kume,

²⁵ i sinta na si lugar di kustumu, lungu di paredi; Jonatas sinta si dianti; Abner sinta lungu di Saul, ma lugar di Davi staba vaziu.

²⁶ Saul ka fala nada na ki dia, pabia i pensa kuma sertamenti Davi sta impuru; yar un kusa kontisi ku el ku pul pa i ka sta puru.

²⁷ Na utru dia, ku sedu sugundu dia di lua nobu, lugar di Davi staba vaziu. Saul punta si fiju Jonatas: “Pabia di ke ku fiju di Jesé ka bin kume aonti nin aos?”

²⁸ Jonatas ruspundi Saul i falal: “Davi pidin ciu pa N dal lisensa pa i bai pa Belen;

²⁹ i falan: ‘N pidiu pa bu disan bai, pabia no familia tene un sakrifisiu na prasa; ña ermon manda falan pa N bai. Si N oja fabur bu dianti, bu ta disan bai jubi ña ermons.’ E ku manda i ka bin kume ku rei.”

³⁰ Raiba di Saul rebenta kontra Jonatas, i falal: “Fiju di minjer tortu i rebeldi! N sibi kuma bu sta a fabur di fiju di Jesé; bu na tisi borgoña riba di bu kabesa, tambi riba di mame ku padiu.

³¹ Nkuantu fiju di Jesé sta bibu ne mundu, nin abo nin bu renu ka sta suguru. Manda buskan el gosi-gosi, pabia i dibi di muri.”

³² Jonatas ruspundi si pape i puntal: “Pabia di ke ki ten ku muri? Ke ki fasi?”

³³ Saul ferca si kañaku pa el pa matal. Asin Jonatas ntindi kuma si pape pui na sintidu pa mata Davi.

³⁴ Jonatas lanta na mesa ku raiba, i ka kume na ki sugundu dia di lua nobu, pabia i fikaba ku kasabi manera ku si pape na maltrataba Davi.

³⁵ Parmaña di utru dia Jonatas bai pa ki lugar na ora ki rumaba ku Davi; i leba un rapasiñu ku el,

³⁶ i falal: “Kuri, bu bai buska fleŝas ku N na ferca.” Oca rapas na kuri, Jonatas ferca un fleŝa si dianti.

³⁷ Oca rapas na ciga na kau ku fleŝa staba nel, Jonatas grita si tras i falal: “Jubi, ala fleŝa bu dianti.

³⁸ Janti! Kuri dipresa; ka bu tarda!” Rapas kuji fleŝa, i riba pa si mestre.

³⁹ I ka ntindi nada; son Jonatas ku Davi ku sibiba di ki asuntu.

⁴⁰ Jonatas ntrega mansasa na mon di rapas, i falal: “Leban el pa prasa.”

⁴¹ Oca rapas bai, Davi lanta tras di ki pedra, i mpina tris bias ku si rostu na con; e beẑa ŋutru, e cora juntu, ma Davi ku mas cora ciu.

⁴² Jonatas fala Davi: “Bai ku pas. Deus ta judanu kumpri kil ku no jurmenta pa ŋutru na nomi di SIÑOR, oca no fala: ‘SIÑOR na sta na no metadi pa sempri, ku na metadi di no familias.’ ” Davi lanta i bai; Jonatas riba pa prasa.