1 Samuel 18 - BIBLIA - traduson antigu in Krioulo

Amisadi di Jonatas ku Davi

¹ Oca Davi kaba papia ku Saul, si korson liga ku korson di Jonatas; Jonatas amal suma si kurpu.

² Disna di ki dia Saul fika ku Davi, i ka disal riba pa kasa di si pape.

³ Jonatas ku Davi fasi un kontratu, pabia Jonatas amaba Davi suma si kurpu propi.

⁴ I tira kapa ki bisti, i da Davi el, suma tambi si kamisa di gera, si spada, si mansasa ku si sintu.

⁵ Davi ta baiba tudu kau ku Saul mandal, i ta fasi tudu kusa diritu, tok Saul pul riba di tropas; tudu jinti kontenti ku el, te propi ŝefis di tropas kontenti.

Saul ka fika kontenti ku kantiga di minjeris

⁶ Oca Davi kaba mata ki filisteu, tropas na riba ja pa kasa, minjeris di tudu prasas di Israel e sai ku tambriñas ku violas pa bai kontra ku rei Saul; e na kanta ku kontentamentu, e na baja.

⁷ Oca ke na toka, e na kanta ŋutru, e na fala: “Saul mata si milyaris, ma Davi si des milyaris.”

⁸ Saul paña raiba; ki palabras ka fikal sabi. I fala na si sintidu: “E na da Davi si des milyaris; ami, son milyaris ke dan! Na bardadi, ke ku faltal mas si i ka renansa?”

⁹ Disna di ki dia pa dianti, Saul diskunfia di Davi.

¹⁰ Utru dia SIÑOR manda spiritu mau riba di Saul tok i na dispapia na si kasa. Davi na toka arpa suma ki kustuma ta fasi, ma Saul teneba un kañaku na mon.

¹¹ I fala na si sintidu: “N na prega Davi na paredi.” Asin i toma kañaku, i fercal pa Davi, ma Davi libra del dus bias.

¹² Saul tenba medu di Davi, pabia SIÑOR staba ku el, ma i disaba ja Saul.

¹³ Asin i ranja manera di tira Davi na kasa; i pul suma ŝef di mil soldadu. Davi ta baiba sempri dianti di tropas.

¹⁴ Tudu ki ta fasiba ta kuri diritu, pabia SIÑOR staba ku el.

¹⁵ Oca Saul nota na manera ku tudu ta kuril diritu, i sinti medu del.

¹⁶ Tudu Israel ku Judá gostaba di Davi, pabia i ta baiba sempri dianti di tropas.

Davi kasa ku fiju di Saul

¹⁷ Saul fala Davi: “Ali Merab, ña purmeru fiju femia; N na dau el pa bu kasa. N misti son pa bu sirbin ku koraẑen, bu geria geras di SIÑOR.” Ma Saul na falaba na si sintidu kuma i ka el propi ku na pui mon na Davi, ma i filisteus ku na matal.

¹⁸ Davi punta Saul: “Ami i kin na Israel? Kin ki ña parentis ku familia di ña pape pa N kasa ku fiju di rei?”

¹⁹ Ma oca tempu ciga pa Merab, fiju di Saul, kasa ku Davi, i dadu kasamenti pa Adriel, meolatita.

²⁰ Mikal, ki utru fiju femia di Saul, i amaba Davi; oca jinti konta Saul, i fika kontenti,

²¹ i fala na si sintidu: “N na dal el pa i pudi sedu armadilia pa el, pa mon di filisteus pudi bai kontra el.” Asin Saul fala Davi: “Bu na bin kasa e utru fiju.”

²² Dipus, Saul da si ŝefis ordi pa e papia ku Davi na sigridu, e falal: “Jubi, rei gosta ciu di bo; tudu si ŝefis amau. Gosi i tempu pa bu kasa fiju di rei.”

²³ Ŝefis di Saul ripiti tudu ki palabra na oreja di Davi. Davi punta elis: “Bo pensa i kusa pikininu pa sedu maridu di fiju di rei? Ami i omi koitadi ku ka sedu ningin.”

²⁴ Ŝefis di Saul bai kontal tudu ke ku Davi fala.

²⁵ Saul manda elis pa e bai fala Davi: “Rei ka misti utru pagamentu di kasamenti si i ka sen prepusiu di filisteus, pa pudi torna vingansa na si inimigus.” Ma planu di Saul i pa filisteus pudi mata Davi.

²⁶ Ŝefis bai konta Davi ki palabra; i fika kontenti pa i kasa ku fiju di rei ku ki pagamentu. Antis di dia markadu,

²⁷ Davi lanta, i bai ku si omis, e mata duzentus filisteu; Davi sirkunsida elis, i tisi se prepusius, i ntrega elis kompletu pa rei, pa i pudi kasa ku si fiju. Asin Saul dal si fiju pa i kasa.

²⁸ Saul nota kuma SIÑOR staba ku Davi; si fiju Mikal amaba tambi Davi.

²⁹ Asin Saul mas na sinti medu del, i sedu si inimigu pa restu di si vida.

³⁰ Ora ku ŝefis di filisteus sai pa elis, Davi mas ta ngaña kontra elis di ki tudu ŝefis di Saul; asin i tenba manga di fama.