1 Samuel 16 - BIBLIA - traduson antigu in Krioulo

Samuel unji Davi

¹ SIÑOR punta Samuel: “Te kal tempu ku bu na sinti dur di Saul suma ku N negal pa ka i rena riba di Israel? Inci bu cifri azeiti, bu pega kamiñu. N na mandau pa Jesé di Belen, pabia N kuji un di si fijus pa i sedu rei.”

² Samuel puntal: “Kuma ku N pudi bai? Ora ku Saul obil, i na bin matan.” SIÑOR falal: “Leba un fiju di baka, bu bai fala kuma bu bin pa sakrifika pa SIÑOR.

³ Bu na kumbida Jesé pa sakrifisiu; N na kontau ke ku bu na fasi; bu na unjin kil ku N mostrau.”

⁴ Samuel fasi kil ku SIÑOR falal; i bai pa Belen. Garandis di prasa sai pa bai dal kontrada, e na tirmi, e puntal: “Bu visita i di pas?”

⁵ I fala elis: “Sin, i di pas. N bin sakrifika pa SIÑOR. Bo purifika bo kurpu, bo bin ku mi pa no bai sakrifika.” El propi i purifika Jesé ku si fijus, i kumbida elis pa sakrifisiu.

⁶ Oca ke na yentra, Samuel oja Eliab, i fala na si sintidu: “Sertamenti es ku firma dianti di SIÑOR, i el ku sedu si unjidu.”

⁷ Ma SIÑOR fala Samuel: “Ka bu mporta ku si parsensa, manera ki altu asin, pabia N negal. SIÑOR ka ta jubi manera ku omi ta jubi, pabia omi ta jubi kil ku sta dianti di si uju, ma SIÑOR ta jubi korson.”

⁸ Jesé coma Abinadab, i pul pa i pasa dianti di Samuel, ma Samuel fala: “Tambi i ka es ku SIÑOR kuji.”

⁹ Dipus Jesé pui Samá pa i pasa, ma Samuel fala: “Nin i ka es tambi ku SIÑOR kuji.”

¹⁰ Asin Jesé pui seti di si fijus pasa dianti di Samuel, ma Samuel fala Jesé: “SIÑOR ka kuji esis.”

¹¹ Dipus i punta Jesé: “Asin ku bu fijus kaba?” Jesé falal: “I falta inda ki mas pikininu, ma i na bakia karnel.” Samuel fala Jesé: “Manda comal, pabia no ka na sinta na mesa tementi i ka ciga li.”

¹² I manda buskal. I seduba rapas bonitu, ku kara di saudi, ku bon parsensa. SIÑOR fala Samuel: “Lanta bu unjil, pabia i es propi.”

¹³ Asin Samuel toma cifri di azeiti, i unjil na metadi di si ermons. Disna di ki dia pa dianti, Spiritu di SIÑOR toma konta di Davi. Samuel lanta, i riba pa Ramá.

Davi na kasa di Saul

¹⁴ Spiritu di SIÑOR sai na Saul; SIÑOR manda un spiritu mau ku ta binba riba del suma sombra.

¹⁵ Konsijaduris di Saul falal: “Jubi, un spiritu mau ku SIÑOR manda i ta sta riba di bo suma sombra.

¹⁶ Ñu Rei ta da ordi pa si servus li pa e buska un omi ku sibi toka arpa. Ora ku ki spiritu mau bin riba di bo, ki algin ta toka; asin bu ta fika minjor.”

¹⁷ Saul fala si servus: “Bo buskan un omi ku ta toka ben, bo tisin el.”

¹⁸ Un di rapasis ruspundi i fala: “N oja un fiju di Jesé di Belen ku sibi toka arpa. I algin di koraẑen ku sibi geria. I ta papia ben, i ten bon parsensa; SIÑOR sta ku el.”

¹⁹ Saul manda jinti pa Jesé pa e falal: “Mandan bu fiju Davi, kil ku ta bakia karnel.”

²⁰ Jesé manda si fiju Davi pa Saul, ku un fiju di kabra, un buru kargadu di pon, ku un saku di kuru ku teneba biñu.

²¹ Asin Davi bai pa Saul, i fika na si sirvis. Saul gostaba ciu del. I bin sedu rapas ku ta leba material di gera di Saul.

²² Saul manda fala Jesé: “Disa Davi pa i fika na ña sirvis, pabia N kontenti ku el.”

²³ Ora ku Deus manda spiritu mau riba di Saul, Davi ta tomaba arpa, i toka. Asin Saul ta sinti lebiadu; spiritu mau ta sai nel; i ta fika minjor.