1 Samuel 13 - BIBLIA - traduson antigu in Krioulo

Gera kontra filisteus

¹ Saul staba ja un anu na si renansa. Na sugundu anu ki na rena riba di Israel,

² i kuji tris mil omi di Israel; dus mil fika ku el na Mikmás, tambi na montaña di Betel; mil staba ku Jonatas na Jibeá di Benjamin. Saul dispidi ki restu di omis, kada kin pa si kasa.

³ Jonatas ataka kampamentu di filisteus na Jeba. Filisteus obi e kusa. Saul manda toka korneta na tudu parti di Israel, i fala: “Ebreus pa e obil!”

⁴ Tudu Israel obi kuma Saul ataka kampamentu di filisteus, kuma tambi Israel sedu ja ofensa pa filisteus. Tropas comadu pa junta ku Saul na Jilgal.

⁵ Filisteus junta pa geria kontra Israel ku trinta mil karu, seis mil tropa di kabalu ku utru tropas ciu suma reia na praia. E bai kampa na Mikmás na ladu di orienti di Bet-Aven.

⁶ Oca omis di Israel oja kuma e sta mal (pabia tropas staba pertadu), utrus bai sukundi na kavernas, utrus na matu, utrus na metadi di pedras garandi, na abrigus o na fontis.

⁷ Utru ebreus kamba Jordon pa tera di Gad ku Jilead. Saul fika inda na Jilgal; tudu tropas ku staba ku el e na tirmi ku medu.

Samuel raprindi Saul

⁸ I pera seti dia, konformi Samuel falalba, ma Samuel ka ciga na Jilgal; omis kumsaba ja pajiga.

⁹ Saul fala: “Tisin limarias pa oferta kemadu ku oferta di pas.” I sakrifika oferta kemadu.

¹⁰ Oca ki na kabanta ja sakrifika ki oferta kemadu, Samuel ciga. Saul bai kontra ku el pa falal manteña.

¹¹ Samuel puntal: “Ke ku bu fasi?” Saul falal: “Suma ku N oja kuma tropas na pajiga ku mi, abo tambi bu ka ciga na tempu ku bu fala, filisteus juntaba ja na Mikmás,

¹² N fala kuma filisteus na bin gosi kontra mi na Jilgal, N ka ora inda pa buska SIÑOR. N sinti forsadu pa sakrifika oferta kemadu.”

¹³ Samuel fala Saul: “Bu fasi tulesa, bu ka obdisi mandamentu ku SIÑOR bu Deus dau. Si bu obdisiba, SIÑOR na konfirmaba bu renansa riba di Israel pa sempri,

¹⁴ ma gosi bu renu ka na tarda. SIÑOR buska ja un omi ku si korson pudi kontenti ku el, i nomial pa i sedu rei riba di si pobu, pabia bu ka obdisi ordi ku SIÑOR dau.”

¹⁵ Samuel lanta i sai di Jilgal, i bai pa Jibeá di Benjamin. Saul fasi konta di tropas ku staba ku el; e seduba serka di seizentus omi.

¹⁶ Saul ku si fiju Jonatas ku omis ku staba ku elis e fika na Jibeá di Benjamin, ma filisteus kampa na Mikmás.

¹⁷ Tropas filisteu ta saiba na se kampamentus na tris grupu pa bai ataka. Un grupu ta bai pa Ofra na con di Sual,

¹⁸ utru ta bai pa Bet-Oron, utru ta bai pa kamiñu di frontera di nunde ku bu pudi oja Kobon di Zeboin na ladu di lala.

¹⁹ I ka tenba nin un fereru na tudu tera di Israel, pabia filisteus mistiba tuji ebreus kumpu spada ku kañaku.

²⁰ Asin tudu Israel tenba ku bai pa filisteus pa bai mola se radi, o nŝada, o mancadu o faka.

²¹ Filisteus ta kobraba oitu grama di prata pa mola radi o nŝada; e ta kobra kuatru grama pa mola forkija di tris dinti, o mancadu, o pa miti ponta nobu na po di gia turu.

²² Asin, na dia di gera, son Saul ku si fiju Jonatas ku teneba feramentu di gera; nin un di tropas ku staba ku elis ka teneba spada nin kañaku.

²³ Filisteus manda un grupu di soldadu pa e guarda kamiñu di Mikmás.