1 Samuel 12 - BIBLIA - traduson antigu in Krioulo

Samuel ntrega kargu

¹ Samuel fala tudu Israel: “N obi tudu ku bo falan, N pui un rei riba di bos.

² Gosi bo tene ja un rei ku na gia bos. Ami N beju ja, N tene kabelu branku. Ali ña fijus sta ku bos. N sedu bo ŝef disna di ña mininesa te aos.

³ Alin li; bo tustumuña kontra mi dianti di SIÑOR ku dianti di si rei unjidu, si N toma turu di algin, o N toma buru di algin, o N fasi algin tarpasa, o N maltrata algin, o N toma suku di bas na mon di algin pa N pudi tapa uju. Si N fasi kualker de kusas, N ta torna bos el.”

⁴ E falal: “Bu ka fasi tarpasa na nada, nin bu ka maltratanu, nin bu ka toma nada na mon di ningin.”

⁵ I fala elis: “SIÑOR i tustumuña kontra bos; si unjidu tambi i tustumuña aos, kuma bo ka oja nada na ña mon.” Pobu falal: “I ta sedu tustumuña.”

⁶ Samuel fala pobu: “SIÑOR propi ku kuji Moisés ku Aron, i tira bo papes na tera di Ejitu.

⁷ Bo firma li, N na mostra bos bo kulpa dianti di SIÑOR; N na lembranta bos tudu kusas bon ku SIÑOR fasi pa bos ku bo papes.

⁸ “Oca Jakó bai mora na Ejitu, mas tardi bo papes coma SIÑOR oca ejipsius na kastigaba elis. SIÑOR manda Moisés ku Aron; e bai tira bo papes na Ejitu, e pui elis pa e mora ne tera.

⁹ “Bo papes diskisi di SIÑOR se Deus; asin el i bin ntrega elis na mon di jinti ku geria kontra elis, ku sedu Sísera, ŝef di tropas di Azor, ku filisteus ku rei di moabitas.

¹⁰ E yalsa fála e coma SIÑOR, e falal: ‘No peka, pabia no disa SIÑOR, no bai na sirbi baalins ku astarotis, ma si bu libranu na mon di no inimigus, no na adorau.’

¹¹ SIÑOR manda Jerubaal, Barak, Jeftá ku Samuel; e libra bos na mon di inimigus ku sta na bo roda; asin bo fika suguru.

¹² “Oca bo oja kuma Naás, rei di fijus di Amon, i na bin kontra bos, bo falan: ‘Nau, ma un rei na rena riba di nos,’ kontudu SIÑOR bo Deus seduba bo rei.

¹³ Gosi, ali rei ku bo kuji, bo pidil; SIÑOR pul riba di bos.

¹⁴ Si bo rispita SIÑOR, bo adoral, bo obdisi si palabra, bo ka sedu rebeldi pa si ordi, abos tudu ku rei ku na rena riba di bos bo sigi SIÑOR bo Deus, i ta sedu bon,

¹⁵ ma si bo ka seta obi palabra di SIÑOR, ma bo sedu rebeldi pa si ordis, mon di SIÑOR na sta kontra bos, suma ki staba kontra bo papes.

¹⁶ “Bo sikidu ketu pa bo jubi e garandi kusa ku SIÑOR na bin fasi bo dianti.

¹⁷ No sta ja na kebur di trigu, i ka asin? Ma N na coma SIÑOR; i na manda turbada ku cuba. Si bo ojal, bo na rapara kuma bo fasi garandi pekadu dianti di SIÑOR manera ku bo pidil un rei.”

¹⁸ Samuel coma SIÑOR; SIÑOR manda turbada ku cuba na ki dia. Tudu pobu sinti garandi medu di SIÑOR ku di Samuel.

¹⁹ E fala Samuel: “Roga SIÑOR bu Deus pa bu servus, pa ka no muri, pabia riba di tudu no pekadu no buri e mal, di pidi un rei.”

²⁰ Samuel fala pobu: “Ka bo ten medu. Na bardadi bo fasi tudu e mal, ma ka bo disa SIÑOR. Bo sirbi SIÑOR ku tudu bo korson.

²¹ Ka bo disvia pa bai tras di idulus ku ka bali, ku ka ten nada di purbitu, nin e ka ta libra bos pabia e ka sedu nada.

²² Pabia di si garandi nomi SIÑOR ka na nega si pobu, pabia i seduba si vontadi propi pa fasi bos si pobu.

²³ Pa ña parti, SIÑOR ta judan pa N ka fasi e pekadu kontra el, di para ora pa bos, ma N na nsina bos kamiñu bon i justu.

²⁴ Bo pui sintidu pa rispita SIÑOR, bo sedu fiel na sirbil ku tudu bo korson, bo lembra di kusas garandi ki fasi pa bos.

²⁵ Ma si bo kontinua na fasi mal, bo na bin kabadu ku el, abos tudu ku bo rei.”