1 Samuel 1 - BIBLIA - traduson antigu in Krioulo

Elkana ku si familia

¹ I tenba un omi di Ramatain di Zofin, na montaña di Efrain; si nomi i Elkana, fiju di Jeroan, fiju di Eliu, fiju di Tou, fiju di Zuf, efrateu.

² Ki omi teneba dus minjer; nomi di un seduba Ana, di ki utru i sedu Penina. Penina teneba fijus, ma Ana ka teneba.

³ Kada anu Elkana ta saiba di si prasa pa bai pa Siló pa adora SIÑOR ku ten tudu puder, pa fasi sakrifisius pa el. La na Siló i tenba saserdotis di SIÑOR ku sedu Ofni ku Fineias, dus fiju di Eli.

⁴ Ora ku Elkana na fasiba sakrifisiu, i ta daba si minjer Penina si kiñon; i ta daba tambi tudu fijus macu ku femia di Penina se kiñon,

⁵ ma i ta daba Ana padas mas garandi, pabia i amalba ciu, kontudu SIÑOR tujil padi.

⁶ Manera ku SIÑOR tujilba padi, si kumbosa ta provokal ciu pa i paña raiba.

⁷ Asin ki ta kontisiba kada anu. Ora ku Ana baiba pa kasa di SIÑOR, si kumbosa ta provokalba tok i ta cora, i ta nega kume.

⁸ Si omi Elkana ta puntalba: “Ana, pabia di ke ku bu na cora? Ke ku manda bu ka na kume? Pabia di ke ku bu sta ku kasabi na bu korson? Nta N ka sedu mas minjor pa bo di ki des fiju?”

Ana pidi Deus pa i dal un fiju

⁹ Un dia, dipus ke kaba kume e bibi na Siló, Ana lanta. Saserdoti Eli sintaba na un asentu lungu di un pilar di kasa di SIÑOR.

¹⁰ Ana, ku kasabi na si korson, i ora pa SIÑOR, i cora ciu,

¹¹ i fasi votu i fala: “SIÑOR ku ten tudu puder! Si bu jubi pa ña kasabi, bu lembra di mi, bu ka diskisi di bu servu, ma bu dan un fiju macu, N na ntrega SIÑOR el tudu tempu di si vida; faka ka na pasa na si kabelu.”

¹² Oca ki kontinua na ora dianti di SIÑOR, Eli nota pa si boka,

¹³ pabia Ana na papiaba na si korson; son si bis ku na bulbuliba, ma si fála ka na obidu. Eli kudaba kuma i cami,

¹⁴ i puntal: “Te kal tempu ku bu na fika camidu? Para bibi biñu.”

¹⁵ Ana ruspundi i falal: “Nau Siñor, N ka cami. Ami i un minjer ku sta tristi dimas. N ka bibi nin biñu nin bibida forti, ma N darma ña korson dianti di SIÑOR.

¹⁶ Ka bu toma bu servu suma minjer mau, pabia N papia te gosi na ña kasabi, ku manga di tristesa.”

¹⁷ Eli ruspundi i falal: “Bai ku pas. Pa Deus di Israel dau kusa ku bu pidil.”

¹⁸ Ana falal: “I bon pa N kontinua oja fabur na bu uju.” Asin i bai si kamiñu, i kume; si rostu ka fika mas tristi.

¹⁹ E lanta mandrugada, e adora dianti di SIÑOR, e riba pa se kasa na Ramá. Elkana dita ku Ana si minjer; SIÑOR lembra del.

Samuel padidu, i dedikadu pa Deus

²⁰ I pasa sertu tempu, Ana preña, i padi un fiju, i coma si nomi Samuel, pabia i fala kuma i pidil na mon di SIÑOR.

²¹ Oca ki omi Elkana ku tudu si familia riba pa bai fasi sakrifisiu pa SIÑOR, suma ki ta fasi kada anu, tambi pa kumpri si votu,

²² Ana ka bai, ma i fala si omi: “Ora ku mininu sai na mama, N na lebal pa pursental dianti di SIÑOR, pa i bai fika la pa sempri.”

²³ Si omi Elkana falal: “Fasi kil ku bu oja kuma i bon. Fika tok bu tiral na mama. N misti son pa SIÑOR kumpri si palabra.” Asin minjer fika, i mamanta si fiju tok i sai na mama.

²⁴ Oca ki tiral na mama, i toma turu di tris anu, vinti kilu di foriña, ku biñu na un saku di kuru, i lebal pa kasa di SIÑOR na Siló; mininu seduba inda pikininu dimas.

²⁵ E mata ki turusiñu, e leba mininu nunde Eli.

²⁶ Ana fala: “Talves Ñu pudi lembra di mi. Ami i ki minjer ku staba li ku bo pa ora pa pidi SIÑOR.

²⁷ N na pidiba Deus pa i dan e mininu. SIÑOR dan kil ku N pidil.

²⁸ Asin tambi N na ntregal pa SIÑOR pa tudu tempu di si vida, pabia N pidil na mon di SIÑOR.” Asin i adora SIÑOR la.