1 Reis 7 - BIBLIA - traduson antigu in Krioulo

Salomon kumpu si palasiu

¹ Salomon leba trezi anu pa kaba kumpu si propi kasa.

² Kasa di Floresta di Líbanu teneba 46 metru di kumprimentu, 23 metru di largura ku 13,5 metru di altura. I teneba kuatru fila di kulunas di sedru, ku vigas di sedru riba di kulunas.

³ I teneba tetu di sedru riba di vigas ku staba riba di korenta i sinku kuluna, kinzi na kada fila.

⁴ Na tudu dus paredi di ladu i tenba tris fila di janelas ku filaba ku janelas di utru ladu.

⁵ Tudu portas teneba arus di kuatru ladu. Janelas ta filaba ku ŋutru na tris fila.

⁶ I fasi un sala di kulunas di 23 metru di kumprimentu ku 13,5 metru di largura. Sala di entrada staba dianti delis, ku kulunas mas dianti, ku tetu.

⁷ I kumpu tambi sala pa tronu, comadu sala di justisa, nunde ki ta julgaba kasus; i kubril ku sedru, desdi tetu te na con.

⁸ Residensia di Salomon, ku fikaba tras di sala di justisa, i kumpudu na mesmu manera, suma tambi kasa ki kumpu pa si minjer, fiju di Faraó.

⁹ Tudu ki kasas kumpudu ku pedras di bon koldadi, kortadu na midida, seradu ku sera pa ladu di dentru ku fora, desdi si alisersu te na tetu, di paredi di fora te na kintal garandi.

¹⁰ Alisersu kumpudu di pedras di bon koldadi, garandi, utru di 4,5 metru, utru di 3,7 metru.

¹¹ Riba di kila, i tenba pedras di bon koldadi, labradu konformi midida; i tenba tambi sedrus.

¹² Kintal garandi, ku kintal di dentru ku sala di entrada di kasa di SIÑOR, i teneba paredi di tris renku di ladu di pedras labradu, ku un renku di vigas di sedru.

Tarbaju di Uran

¹³ Rei Salomon manda jinti pa Tiru pa tisi Uran,

¹⁴ ku sedu fiju di un minjer viuva, di jorson di Naftali. Si pape seduba un omi di Tiru ku ta tarbajaba na kobri. Uran jiru ba dimas, i tenba ntindimentu, i sibiba fasi tudu koldadi tarbaju di kobri. I bin pa rei Salomon, i fasi tudu tarbaju ki dadu.

Dus kuluna di kobri

¹⁵ Uran forma dus kuluna di kobri, kada un ku altura di 8,2 metru; korda di 5,5 metru pudi rodia kada un.

¹⁶ I kumpu tambi dus kapitel di kobri fundidu pa pui riba di kulunas. Kada kapitel teneba 2,3 metru di altura.

¹⁷ I kumpu korentis, i tisi elis pa forma sintus di redi, pa faja kapitelis ku staba riba di kulunas, seti pa kada kapitel.

¹⁸ I kumpu dus filera di romans na roda, riba di redi, pa faja ki dus kapitel ku staba riba di kulunas.

¹⁹ Ki kapitelis ku staba riba di kulunas na sala di entrada e teneba forma di lirius di 1,8 metru di altura.

²⁰ E puduba riba di un kusa ku teneba parti rodondu ku staba riba di redi. Duzentus roman na dus filera e rodiaba kada kapitel.

²¹ Uran lantanda ki kulunas na sala di entrada di templu. Oca ki na lantanda kil di ladu direita, i comal Jakin. Oca ki na lantanda kil di skerda, i comal Boaz.

²² Ki kapitelis ku teneba forma di lirius e staba riba di kulunas. Asin ku tarbaju di kulunas kaba.

Bañera di kobri

²³ Uran kumpu bañera di kobri fundidu, rodondu, di 2,3 metru di altura ku diametru di 4,5 metru. Pa rodial i pirsis ba un korda di 13,5 metru.

²⁴ Bas di borda i tenba dus filera di kabas ku da volta di ki bañera tudu. Na fundison, ki kabas formadu tudu juntu ku bañera.

²⁵ Bañera firmantadu riba di dozi turu, tris ku na viraba rostu pa norti, tris pa ladu di kaida di sol, tris pa sul ku tris ku vira rostu pa ladu di saida di sol. Tudu se rabus staba pa ladu di dentru; bañera finka riba delis.

²⁶ Si grosura midiba 8 sentimetru, si borda parsiba suma borda di un kopu o suma flor di liriu; i ta lebaba korenta i kuatru mil litru.

Stantis di kobri

²⁷ Uran kumpu tambi des stanti movel di kobri; kada un teneba 1,8 metru di kumprimentu, 1,8 metru di largura ku 1,4 metru di altura.

²⁸ Asin ku stantis kumpudu: E teneba fojas ligadu ku kuadrus.

²⁹ Lions, turus ku kirubins diseñadu na fojas ku kuadrus. Riba ku bas di lions ku turus i tenba diseñus batidu di kurvas.

³⁰ Kada stanti teneba kuatru roda di kobri, ku eiŝus di kobri. I teneba tambi un basia ku finka riba di kuatru suporti, un na kada kantu. Ki suportis formaduba ku diseñus di kurvas.

³¹ Stanti teneba un buraku rodondu, nunde ki mitidu un koroa ku midiba 50 sentimetru pa riba di stanti, ma tudu ku parti di bas ku yentraba na buraku i teneba 70 sentimetru. Diseñus labradu nel. Fojas di stanti seduba kuadradu, e ka rodondu.

³² Ki kuatru roda ku staba bas di fojas, e teneba 70 sentimetru di altura. Se eiŝus fundiduba juntu ku stanti.

³³ Rodas kumpudu suma roda di karu; se eiŝus, se kambas, se kubus ku se raius seduba tudu di kobri fundidu.

³⁴ Kada stanti teneba kuatru kau di pega; un son na saiba na kada kantu.

³⁵ Riba di kada stanti i tenba un banda rodondu di 20 sentimetru di altura. Suportis ku fojas e fundiduba juntu ku stanti.

³⁶ Na suportis ku fojas i labra kirubins, lions ku palmeras konformi i oja lugar di pui. I labra tambi diseñus di kurvas na roda delis.

³⁷ Asin ki kumpu ki des stanti. Elis tudu e fundidu na mesmu forma, e seduba igual na midida ku forma.

³⁸ Dipus i kumpu des basia di kobri; kada un ta lebaba oitusentus i oitenta litru, i teneba diametru di 1,8 metru. Un basia staba riba di kada un di ki des stanti.

³⁹ I pui sinku stanti na ladu di sul di templu, i pui sinku na ladu di norti. I pui ki bañera na kantu di sudesti.

⁴⁰ I kumpu tambi basias ku pás ku tiẑelas. Asin Uran kaba tudu tarbaju ku rei Salomon dalba pa i fasi pa kasa di SIÑOR:

⁴¹ Dus kuluna; dus kapitel ku staba riba di ki dus kuluna; dus redi pa faja ki kapitelis ku staba riba di kulunas;

⁴² kuatrusentus roman pa ki dus redi (dus filera di roman pa kada redi ku faja kapitelis ku staba riba di kulunas);

⁴³ des stanti ku se des basia riba delis;

⁴⁴ bañera ku dozi turu bas del;

⁴⁵ basias ku pás ku tiẑelas. Tudu ki kusas ku Uran kumpu pa rei Salomon, pa kasa di SIÑOR, e seduba di kobri pulidu.

⁴⁶ Rei manda forma elis na un kau ku teneba manga di lama, na metadi di Sukot ku Zaretan, pertu di riu Jordon.

⁴⁷ Salomon ka manda pesa tudu ki kusas, pabia e ciu dimas; asin pesu di kobri nunka i ka sibidu.

⁴⁸ Salomon kumpu tambi tudu mobilia ku pirsisaduba pa kasa di SIÑOR: altar di uru; mesa di uru ku teneba pon sagradu riba del;

⁴⁹ kanderus di uru puru, sinku na ladu direita ku sinku na skerda, dianti di kau mas sagradu; floris ku kanderus ku tenaz, tudu di uru;

⁵⁰ kopus, apagaduris, basias, tiẑelas pa nsensu, braserus pa leba fugu nel, tudu di uru puru; dobradisas di uru pa portas di kuartu mas pa dentru, ku sedu lugar mas sagradu, tambi pa portas di templu.

⁵¹ Oca ku tudu tarbaju ku rei Salomon fasi pa kasa di SIÑOR kaba, i leba tudu kusas ku si pape Davi dedikaba pa Deus, ku sedu prata ku uru ku vasus, i pui elis na kuartu di kasa di SIÑOR nunde ke ta guardaba rikesas.