1 Reis 6 - BIBLIA - traduson antigu in Krioulo

Salomon kumpu templu

¹ Kuatrusentus i oitenta anu dipus di fijus di Israel sai na Ejitu, na kuartu anu ku Salomon na rena riba di Israel, na mis di Ziv (ku sedu sugundu mis di anu), i kumsa kumpu kasa di SIÑOR.

² Kasa ku rei Salomon kumpu pa SIÑOR i teneba 27 metru di kumprimentu, 9 metru di largura ku 13,5 metru di altura.

³ Sala di entrada teneba 9 metru di kumprimentu suma largura di kasa; i teneba 4,5 metru di largura dianti di kasa.

⁴ I pui na paredis di kasa janelas mas largu na ladu di dentru di ki na ladu di fora.

⁵ I kumpu tris andar ku kuartus, tudu na roda di paredis di ladus ku di tras di kasa.

⁶ Andar di bas teneba largura di 2,3 metru; purmeru andar teneba largura di 2,7 metru; kil di riba teneba largura di 3,1 metru, pabia paredi di un andar i seduba mas gros di ki paredi di andar ku staba riba del. Asin andar di riba pudi sinta na un parti di paredi di andar ku staba bas del. I ka pirsis ba pa taguas di con mitidu dentru di paredi.

⁷ Pedras ku kasa kumpuduba ku el e bin tudu purparadu; pabia di kila ningin ka obi baruju di martel na kasa, nin di mancadu, nin di un kualker feramentu di feru, oca ke na kumpul.

⁸ Porta di entrada pa ki kuartus staba na ladu di sul. Skada ta bai pa purmeru andar; di la utru skada ta bai pa andar di riba.

⁹ Asin Salomon kumpu kasa, i kabantal, i kubril ku prancons ku taguas di sedru.

¹⁰ Ki kuartus rodiaba tudu kasa; kada andar teneba 2,2 metru di altura. Taguas di sedru liga kuartus ku kasa.

¹¹ SIÑOR bin papia ku Salomon, i falal:

¹² “Si bu yanda konformi ña ordis, bu sigi ña leis, bu obdisi tudu ña mandamentus, ami N na fasiu konformi ña palabra ku N fala bu pape Davi;

¹³ N ta mora na metadi di fijus di Israel ne kasa ku bu na kumpu. N ka na bandona ña pobu Israel.”

¹⁴ Asin Salomon kumpu ki kasa, i kabantal.

¹⁵ I fora paredis di dentru ku taguas di sedru, di tetu pa con; i kubri con ku taguas di piñeru.

¹⁶ I kumpu paredi ku taguas di sedru di tetu pa con, pa forma un kuartu la tras di 9 metru, ku na seduba kau mas sagradu di tudu.

¹⁷ Ki utru parti mas garandi teneba 18 metru di kumprimentu.

¹⁸ Sedru dentru di kasa i labradu na forma di kabas ku di floris abertu. Tudu paredi seduba di sedru; nin un pedra ka na ojaduba.

¹⁹ La mas pa dentru di kasa, Salomon purpara ki kuartu sagradu, pa i pudi pui arka di kontratu di SIÑOR la.

²⁰ Ki kuartu sagradu la dentru teneba 9 metru di kumprimentu, 9 metru di largura ku 9 metru di altura. Salomon kubril tudu ku uru puru; i kumpu altar di sedru.

²¹ I fora paredi di dentru di kasa ku uru puru. I kumpu korentis di uru pa kurtina ku pudu na entrada di kuartu sagradu, ku kubriduba tambi ku uru.

²² Asin i fora tudu kasa ku uru tok i kaba. Tambi ki altar ku staba dianti di kuartu sagradu, i kubril ku uru.

²³ Na ki lugar mas sagradu i kumpu dus kirubin di madera di olivera; kada un teneba altura di 4,5 metru.

²⁴ Un asa di kirubin seduba di 2,25 metru; utru asa tambi i seduba di 2,25 metru. Asin i midi 4,5 metru di ponta di un asa pa utru ponta.

²⁵ Ki utru kirubin tambi i midiba 4,5 metru; tudu dus seduba di mesmu midida ku mesmu forma.

²⁶ Altura di kada kirubin seduba di 4,5 metru.

²⁷ I pui kirubins na metadi di ki kuartu di dentru, ku se asas distindidu. Asa di un tokaba na paredi; asa di ki utru tokaba na utru paredi. Tambi na metadi di kuartu, se asas tokaba ŋutru.

²⁸ I kubri kirubins ku uru.

²⁹ I faja paredis di kasa tudu na roda ku kusas labradu na forma di kirubins, palmeras ku floris abertu, na kuartu di dentru tudu ku ki utru.

³⁰ Tambi i kubri con ku uru, na tudu dus kuartu.

³¹ Na entrada di lugar mas sagradu i pui portas di madera di olivera, ku aru di sinku ladu.

³² Na ki dus porta di madera di olivera i labra kirubins, palmeras ku floris abertu; i kubri elis ku uru. I distindi uru batidu riba di kirubins ku palmeras.

³³ Pa entrada di kuartu garandi, i kumpu aru di kuatru ladu, di madera di olivera,

³⁴ ku dus porta di madera di piñeru. Kada foja di porta teneba dus dobradisa ku ta disa porta bai pa tudu dus ladu, dentru ku fora.

³⁵ I labra portas ku kirubins, palmeras ku floris abertu, i kubri elis ku uru distindidu i batidu riba di ki figuras.

³⁶ I kumpu tambi kintal di dentru ku paredis di tris renku di ladu, di pedras labradu, ku un renku di vigas di sedru.

³⁷ Na kuartu anu, na mis di Ziv, alisersu di kasa di SIÑOR pudu.

³⁸ Na anu 11, na mis di Bul, ku sedu oitavu mis, kasa kaba, ku tudu kusas ku pertensil, konformi Salomon mistiba. I leba seti anu pa kumpul.