1 Reis 5 - BIBLIA - traduson antigu in Krioulo

Salomon fasi kontratu ku Iron, rei di Tiru

¹ Iron, rei di Tiru, tenba sempri amor pa Davi. Oca ki obi kuma Salomon unjidu rei na lugar di si pape, i manda si ŝefis pa el.

² Salomon manda Iron e rasposta:

³ “Bu sibi kuma ña pape Davi tenba di geria sempri kontra inimigus ku ta rodialba. Asin i ka pudi kumpu kasa pa nomi di SIÑOR si Deus tementi SIÑOR ka dal vitoria riba delis tudu.

⁴ Gosi ja, SIÑOR ña Deus dan diskansu na tudu ladu; inimigu ka ten, nin kin ku na bin kontra mi.

⁵ SIÑOR papia ku ña pape Davi, i falal: ‘Bu fiju ku N na pui na tronu na bu lugar i na kumpu kasa na ña nomi.’ Asin N tene ja na ña sintidu pa kumpu kasa pa nomi di SIÑOR ña Deus.

⁶ N pidiu pa bu manda jinti pa e kortan sedrus na Líbanu. Ña omis na tarbaja juntu ku di bo; N na paga bu omis ki vensimentu ku bu pui. Suma ku bu sibi, no ka tene jinti ku sibi korta madera suma bu jinti di Sidon.”

⁷ Oca Iron obi rekadu di Salomon, i fika kontenti dimas, i fala: “SIÑOR dibi di ngabadu aos suma ki da Davi un fiju jiru pa i rena riba di ki garandi pobu.”

⁸ Asin Iron manda fala Salomon: “N obi rekadu ku bu mandan. N na fasi tudu ku bu misti; N na ranjau sedrus ku piñerus.

⁹ Ña omis na leba elis di Líbanu te na mar; e na mara elis suma jangadas, e na leba elis na mar te na kau ku bu kuji. La N na manda dismara elis pa bu pudi toma konta delis. Kusa ku N misti pa bu fasi i pa ranja sustentu pa jinti di ña kasa.”

¹⁰ Asin Iron da Salomon tudu madera di sedru ki mistiba, ku madera di piñeru.

¹¹ Salomon da Iron 121.000 busa di trigu kada anu, ku 440.000 litru di azeiti di olivera, pa sustentu di jinti di si kasa.

¹² SIÑOR da Salomon jiresa suma ki falalba. Pas tenba na metadi di Iron ku Salomon, tok e fasi kontratu entri elis.

Salomon purpara pa kumpu templu

¹³ Rei Salomon coma 30.000 omi na metadi di tudu Israel pa e fasi tarbaju obrigatoriu,

¹⁴ i ta mandaba elis pa Líbanu, 10.000 kada mis. Asin un omi ta tenba un mis na Líbanu ku dus mis na si kasa. Adoniran tenba konta di tarbaju obrigatoriu.

¹⁵ Salomon ranja tambi 70.000 omi ku ta leba kargu, ku 80.000 ku ta korta pedra na montañas,

¹⁶ fora di 3.300 ŝef di Salomon ku staba riba di obra; e ta daba ordi pa jinti ku na fasiba ki tarbaju.

¹⁷ Rei da ordi pa e tisi pedras garandi, di bon koldadi, tudu labradu, pa alisersu di kasa.

¹⁸ Pedrerus di Salomon ku di Iron ku omis di tera di Jebal e labra, e purpara pedras ku madera pa kumpu kasa.